El Semando Fest escosa les entraes a falta de 8 díes pal eventu

Axunta na uvieína Lata de Zinc a músicos y intérpretos mozos en cuatro estilos estremaos.

Nun queden entraes pal Semando Fest. El públicu respondió énte esta propuesta que busca presentar el relevu xeneracional na música asturiana, abrila a públicos nuevos y reivindicar les sales de conciertos y a falta de 8 díes pal eventu escosáronse toles puestes a la venta.

Asina va haber enllenu pa ver les actuaciones d'Alicia Villanueva y Luis Álvarez Pola, a Loína, a Algaire y a Llevólu’l Sumiciu. Asturianada, folk atlánticu, música tradicional con aire más pop y electrónica van poder sentise nuna cita qu'entama Musicasturiana.com programada pal sábadu 4 de febreru a les 19.30 hores.

"Ye una amuesa más del interés que xenera la música'l país y del valor qu'aporta pa la propia escena que'l públicu pague por consumila", celebra la organización, qu'esta mañana anunciaba que namái quedaben 15 entraes disponibles.