El númberu 26 de ‘Cultures’ inclúi un monográficu sobre’l llobu

El 2022 finó cola espublización del númberu 26 de ‘Cultures’, revista de cultura asturiana que venía nos años últimos presentando monográficos. Nesta ocasión la espublización de l'Academia de la Llingua Asturiana (ALLA) dirixida por Roberto González-Quevedo amás de dedicar una parte a un tema, el llobu, inclúi cuatro artículos más sobre otres cuestiones y trés reseñes.

El papel de la muyer como personaxe y como narradora na tradición oral española, la función ancestral de los güesos nel caltenimientu físicu del ánima, la deportificación de los xuegos tradicionales asturianos y la tresformación de los sos espacios o les competiciones de bateles n'Asturies son los aspeutos que se traten nesti ‘Cultures’, trabayos firmaos por María Jesús Ruiz, Alberto Álvarez Peña, Carlos Suari y Ángel Obregón, de manera respeutiva. Siguen los conteníos con trés artículos sobre’l llobu dende un análisis del problema socioeconómicu y cultural d'anguaño hasta un repasu históricu y xurídicu de los métodos de caza.

Asina Xosé Alba escribe ‘Llobu llobatis. A propósitu del problema del llobu n’Asturies’, David Ordóñez fai un ‘Averamientu a les construcciones históriques pa la caza de llobos nel centru d’Asturies’ y Antonio J. Pestana trata sobre ‘La caza del llobu’. Pieslla'l númberu González-Quevedo con trés reseñes: ‘Una antropología del amor. De Oriente a Occidente’, de Josefina Pimienta Lobato; ‘Lo que el tiempo trajo (y lo que se llevó). Cincuenta años de mirada antropológica’, d'Adolfo García Martínez; y ‘Romances tradicionales de Eva González Fernández’, de José Manuel Fraile Gil.

Na semeya, González-Quevedo na presentación del númberu anterior de 'Cultures'.