Constituyóse l'agrupación del Oriente d'Aína nun clima constructivu

La perda población y el tresporte públicu, el papel de los seutores productivos tradicionales nel rural o les implicaciones del turismu, les principales esmoliciones de los presentes.

L'Infiestu acoyó ayeri la constitución de la tercer agrupación llocal d'Aína, la del Oriente, que se suma a la d'El Nalón y Xixón. Foi nun clima constructivu y con ganes de trabayar en positivu por parte de los participantes, una quincena de persones.

Taben convocaos pa esta cita los ciudadanos de Piloña, Villaviciosa, Cabranes, Bimenes, Nava, Parres, Ribeseya y Llanes inscritos nel procesu de creación d'Aína, y convidaos tolos habitantes de los conceyos d'esta fastera del país. Los promotores informaron a los presentes de los pasos daos nos últimos dos meses pa la constitución llegal de la organización y la consolidación n'afiliaes de les cerca de 200 persones que quixeron participar na fundación d'esti partiu que busca dar soluciones dende una perspeutiva asturianista.

Llueu aldericóse sobre problemes como la perda de población, sobre manera nes ales del país, les dificultaes pa dedicase a sectores tradicionales como la ganadería y l'agricultura, el deterioru de les redes de comunicación y tresporte, o les implicaciones del modelu actual de turismu nuna zona tan masificada como l'oriente. Los participantes coincidieron na importancia de la perspeutiva cercana y l'autonomía a la hora de dar soluciones d'un partíu d'obediencia esclusivamente asturiana.

"El partíu plantó la semiente pa que xorreza nos conceyos del oriente un nuevu asturianismu políticu basáu na cercanía, el pragmatismu y con propuestes pa construir un país con mayor xusticia social y arguyosu de la so identidá", apunten dende Aína, que va siguir col procesu de constitución d'agrupaciones llocales mientres se prepara l'Asamblea Nacional.