El PSOE ganaría les eleiciones en "respuesta espontánea" nuna encuesta del CIS

La formación liderada por Adrián Barbón sacaría 13 puntos al primer partíu de la oposición.

El Centru d'Investigaciones Sociolóxiques (CIS) asoleyó güei l'avance de resultaos d'una 'Macroencuesta sobre tendencies en votu autonómicu' d'aquellos territorios con eleiciones en mayu. Nos datos que correspuenden a Asturies, nos que nun se fai una estimación d'escaños pola esistencia de les trés circunscripciones, lo que provoca "insuficiencies muestrales" –tamién asocede n'Illes Balears y Canarias–, el ganador sería'l PSOE en "respuesta espontánea" con un 25,9 por cientu.

En concreto, la entruga plategada ye "suponiendo que mañana se celebrasen eleiciones na so comunidá autónoma, ¿a qué partíu votaría vusté?". La segunda opción más escoyida foi'l PP, con un 12,7 por cientu, mentes que la tercera sería la conxunta d'Izquierda Xunida (IX) y Podemos, presentaes baxo Xuníes Podemos, con un 9,5 por cientu.

VOX quedaría como cuarta fuercia con un 6,5 por cientu, Ciudadanos tendría un 0,6 y Foro un 0,4, mesmu porcentaxe que PACMA y Los Verdes. La opción 'Otru partíu' algamaría un 2,2 por cientu y un 24,9 por cientu de los encuestaos respondieron qu'entovía "nun sabe".

Ente'l 17 de payares y el 2 d'avientu

La encuesta fíxose per vía telefónica, a fixos y a móviles, ente'l 17 de payares y el 2 d'avientu, a 266 persones. Al final d'esti periodu foi cuando'l PP anunció'l so candidatu a la presidencia del país, Diego Canga, en concreto'l 28 de payares.

Na semeya, l'actual presidente del país y secretariu xeneral de la Federación Socialista Asturiana (FSA-PSOE), Adrián Barbón, nel Comité Autonómicu celebráu'l sábadu en La Felguera.