L’INE nun entrugó n’Asturies pola llingua propia como sí fixo nes autonomíes nel que'l so idioma ye oficial

Una encuesta del Instituto Nacional de Estadística (INE) asoleyada esta selmana apuntaba que n’Asturies un 2,8 por cientu de los ciudadanos consideraben que falaben bien asturianu, cifra emplegada dende dellos sectores pa cargar contra l’idioma. Lo cierto, como confirmó l’organismu a Asturies.com, ye que’l cuestionariu nun entrugó pola llingua asturiana como sí fixo nes comunidaes con idioma cooficial pola propia.

“El cuestionariu usáu pa la Encuesta de Carauterístiques Esenciales de la Población y Viviendes (ECEPOV) en toa España contenía un únicu conxuntu d’entrugues. Sicasí, en particular, la entruga sobre conocimientu de llingües tenía un tratamientu distintu nes comunidaes autónomes con llingua cooficial, dao que néstes figuraben preimpreses les dos llingües (el castellanu y la otra llingua). Amás, neses comunidaes autónomes entregábense a los llares cuestionarios nes dos llingües cooficiales”, esplicó l’área del INE encargada de la realización de dicha encuesta.

N’Asturies, al nun ser l’asturianu cooficial, llegó’l mesmu cuestionariu que nel restu del Estáu, entrugando a los encuestaos namái pol castellanu, lo qu’esplica esi baxu 2,8 por cientu que sorprendió a tol mundu. “Nel restu de comunidaes autónomes namás figura preimpresu’l castellanu y les demás llingües qu’apaecen son les qu’espontáneamente declaren los informantes. Asina, n’Asturies, agrúpense baxo l’epígrafe ‘asturiano’ distintes respuestes como ‘bable’ o ‘asturleonés’ declaraes nos cuestionarios”.

Na imaxe superior, cuestionariu emplegáu n'Asturies, onde namái se pregunta pol castellanu. Na inferior, l'usáu en gallegu nel que s'entruga específicamente pola llingua propia.