Iniciativa pol Asturianu presenta alegaciones al decretu de creación de la Rede de Biblioteques Públiques pa que tenga compromisu llingüísticu

Hasta’l día 28 ta abiertu’l plazu pa presentar alegaciones al decretu que tien como oxetivu crear la Red de Bibliotecas Públicas del Principado de Asturias. Iniciativa pol Asturianu rexistró delles, nes que reclama l’usu nel nome de les llingües propies d’Asturies y la incorporación d’un puntu nel testu qu’afite’l so compromisu en materia llingüística.

En primer llugar esti coleutivu reclama “l’usu del nome n’asturianu del ente (Rede de Biblioteques Públiques del Principáu d’Asturies y Rede de Bibliotecas Públicas del Principao d’Asturias utilizando l’eonaviego na so zona) pola visibilidá y el papel normalizador que pueden tener estos espacios”. Tamién solicita la inclusión d’un puntu nuevu nel artículu 8 ‘Principios informadores’ entituláu ‘Principiu de compromisu llingüísticu’ “nel que se recueya’l papel que tien que xugar esta rede en materia llingüística en consonancia col Estatutu d’Autonomía y la propia Llei 1/1998, de 23 de marzu, d’Usu y Promoción del Bable/Asturianu”.

Por últimu, pide “tener en cuenta l’usu de la toponimia oficial nes comunicaciones y na cartelería de la propia Rede de Biblioteques”. “Esta Rede puede cumplir un papel fundamental nes campañes o iniciatives de la Dirección Xeneral de Política Llingüística asina como de la propia Selmana de les Lletres Asturianes, pudiendo facese dende la propia Rede campañes de promoción del escritor o escritora que tenga’l reconocimientu en cada edición”, apunta Inicitiva, que recuerda que tamién ha tener “un papel fundamental na promoción y visualización de la lliteratura n’asturianu y n’eonaviegu”.

“Ésti puede ser l’entamu d’una acción conxunta de collaboración ente les distintes biblioteques del territoriu, qu’amás va permitir un aforru de costos y de trabayu por mor de l’acción conxunta y la optimización de recursos materiales y personales”, considera la entidá.

Na semeya, Biblioteca d'Asturies 'Ramón Pérez de Ayala', que'l proyeutu de decretu declara cabecera de la Rede.