L'Axencia d'Intelixencia Artificial que quería Xixón va dir a A Coruña

Trece ciudaes aspiraben a ser sede d'esti organismu. L'Axencia Espacial Española, mentes, va asitiase en Sevilla.

Xixón queda ensin l'Axencia Española de Supervisión de la Intelixencia Artificial, candidatura na qu'ufriera la Llaboral y que contara col consensu de tol país. El Conseyu de Ministros d'esta mañana decidióse por A Coruña como sede, pa lo que tuvo en cuenta "el so importante ecosistema universitariu rellacionáu cola intelixencia artificial, el texíu productivu venceyáu cola innovación digxtal, l'apoyu de la comunidá autónoma y les iniciatives municipales pa facilitar la movilidá de los trabayadores", argumentaron.

Amás de les ciudaes gallega y asturiana aspiraben a ser sede de la primer axencia específica d'Europa dedicada a la intelixencia artificial Zaragoza, Tenerife, Logroño, Palma de Mallorca, Alacant, Segovia, Guadalajara, Granada, Barcelona, Salamanca y Jerez. Mentes, l'Axencia Especial Española va quedar en Sevilla, que competía dos decenes de candidatos.

Estos organismos públicos asítiense en llugares diferentes de Madrid, como yera vezu hasta agora, pol oxetivu marcáu pol Gobiernu de descentralizar les instituciones estatales de creación nueva.

Na imaxe, A Terraza de Méndez Núñez, edificiu que va agospiar la sede de l'Axencia Española de Supervisión de la Intelixencia Artificial. Semeya propiedá de Turismo de Galicia.