La Tarrancha zarra la xira del 2022 con un conciertu especial con collaboraciones

Van dalu en La Pola, nel Teatru Vital Aza de la capital ḷḷeniza, baxo'l nome de 'Camín de Venti'.

La Tarrancha celebra mañana los sos cuasi venti años de vida, que cumple nel 2023, con un conciertu especial con delles collaboraciones. Con él zarren la xira d'esti añu y entamen a mirar pa la próxima, que va llamase 'Venti'.

El sitiu escoyíu, el Vital Aza, que "de mano, paez un llugar un poco raru pa un conciertu d'una banda qu’anima a baillar", ye pa la banda "el llugar afaízu pa una gala llena de collaboraciones y calor fraternal". Y ye que pa la cita convidóse a músicos que pasaron per La Tarrancha, como a Nano (guitarrista fundador que formó parte de grandes formaciones punk de los 90), Simón San Jose (percusionista y luthier), Paco Calero (baxista, anguaño en Gemtonics y Bindy Bazaar), Dani Valdés (batería de La Mueska), Dani Alvarez (multiiinstrumentista nel mundo folk y habitual collaborador a les flautes, bouzouki y gaita), Nel de Purnea (baxista que forma parte de Juanillous y Vrienden) y gaiteros y percusionistes de la Banda Gaites Villaviciosa-El Gaitero, amás d'a Carlos García Villamil y Nico Braña, que diben tar presentes pero que causen baxa por motivos llaborales.

'Camín de Venti' va principiar a les 19 hores y tien entrada de baldre. El conciertu va grabase pa tener constancia del momentu, anque La Tarrancha nun descarta asoleyar de dalguna forma el material, yá sía peles redes o en formatu físicu.

Los mandos del soníu y la grabación van tar en manes de los dos téunicos actuales del grupu, el productor Zeros y el cantante Ruboh, qu’amás de facer el soníu va xubir al escenariu a participar nun tema. "A La Tarrancha diba presta-y muncho poder ver ente nes butaques, xente d’otros grupos colos que compartieron tantes coses y público de toles edaes y etapes de la banda. Y como non, a les de siempre", animen los sos integrantes.