“La respuesta recibida da ganes de siguir trabayando”, apunten dende Aína

La Mesa Nacional provisional d’Aína escoyida’l domingu tien 90 díes pa formalizar la creación del partíu, afitar l’afiliación y entamar l’Asamblea Nacional. El grupu promotor d’esti partíu políticu asturianu califica de “ilusionante” lo vivío en Les Vegues y valora tamién la respuesta recibida estos díes, que “da ganes de siguir trabayando”.

“L’ambiente foi mui positivu, les aportaciones constructives y toles iniciatives tratáronse dende’l respetu”, lo que confirmaba “esa sospecha que teníemos de la necesidá d’un proyeutu políticu asina n’Asturies”. “Depués de facer el congresu muncha xente interesóse nél y el feedback, la respuesta recibida, da ganes de siguir trabayando”, siguen los sos responsables.

L’Asamblea Nacional ye l’horizonte próximu hacia’l que camina Aína depués de l’aprobación, “cuasi toes por unanimidá”, de les cuatro ponencies presentaes (ideolóxica-política, estratéxica, organizativa y d’estatutos). La Mesa Nacional, de calter provisional, escoyida nel Congresu Fundacional tien 90 díes pa la so convocatoria, periodu de trés meses nos qu’ha rexistrar Aína como partíu políticu, afitar l’afiliación actual –los participantes el domingu facíenlo como ‘inscritos’– y poner en marcha una campaña d’afiliación de cara a dicha convocatoria

Van ser “los afiliaos y afiliaes de manera democrática na Asamblea Nacional los que tomen decisiones de cara al futuru”, apunta’l grupu promotor entrugáu por Asturies.com pola cercanía de les eleiciones y los planes al respeuto. “Ésti ye un tema que surdió’l domingu, onde se dieron opiniones personales, pero agora toca afitar el partíu, ver qué demanda social tien y ónde s’asitia la xente”, confirma.

Na semeya, persones que conformen la Mesa Nacional provisional d'Aína.