Les XL Xornaes Internacionales d’Estudiu dedíquense a l’asturianística que se fai fuera d’Asturies

Siete ponencies protagonizaes por profesores d’universidaes norteamericanes y una octava d’una institución británica conformen l’actividá central de les XL Xornaes Internacionales d’Estudiu qu’entama l’Academia de la Llingua Asturiana (ALLA) n’Uviéu. ‘La llingua asturiana. Una güeyada dende fuera d’Asturies’ ye’l títulu d’esta edición.

El salón d’actos de la primer palnta del Edificiu Alministrativu de la Facultá de Filosofía y Lletres de la Universidá d’Uviéu acueye dende mañana y hasta’l xueves trés xornaes con ocho ponencies con temes que van de la lliteratura a la sociollingüística y de la pragmática a la emigración asturiana, abarcando asina un panorama bayurosu en perspeutives d’investigación, y nueve comunicaciones y trés presentaciones que, en xunto, ufierten una güeyada amplia de l’asturianística que se fai dende fuera d’Asturies. La inauguración va ser al meudía cola presencia de Xosé Antón González Riaño, presidente de l’ALLA; el rector Ignacio Villaverde; y el decanu de la facultá, José Antonio Gómez Rodríguez.

Darréu van presentase nun mesmu actu’l númberu 127 de la revista ‘Lletres asturianes’ y el 12 de ‘Cientes: cartafueyos asturianos de ciencia y teunoloxía’, entrambes dixitales, pa siguir cola primer ponencia, ‘El papel de la prominencia sociolingüística en el uso variable de rasgos del asturiano’, a cargu de Sonia Barnes, de la Marquette University de Milwaukee. Llueu d’una posa pa xintar, l’actividá va siguir de tarde, a les 16.30 hores, coles conferencies ‘Marques d’asturianía y xuicios de valor: actitúes llingüístiques frente al neutru materia y los pronomes enclíticos’, por María Turrero y Andie Faber, de la Drew University de Madison (New Jersey), y la presentación del llibru ‘Sound, Syntax and Contact in the Languages of Asturias’, de Guillermo Lorenzo, de la Universidá d’Uviéu.

Les comunicaciones de la primer xornada van poneles David Guardado, sobre ‘La propuesta d’una «Academia Asturiana» de Laverde Ruiz en 1878: contestu y papel de Murguía y Menéndez Pelayo na so publicación’; María Fernández Abril, de ‘Los cuentos n’asturianu del Concursu de Microrrellatos Mineros Manuel Nevado Madrid; y Xuan Xosé Lajo, que fala de ‘Nuevos papeles de Krüger: más datos sobre la fala senabresa a entamos del sieglu XX’. Por último, Miriam Villazón, de la University of California de Riverside, va dar la ponencia ‘Entre ‘neofalantes’ y hablantes de herencia: la situación del asturiano’.

Actividá de tarde

La segunda xornada va principiar a les 16 hores cola ponencia ‘Forma entonativa y función nes interrogatives absolutes del asturianu de Mieres’, d’Eduardo García Fernández, de la University of Massachusetts Amherst, pa siguir con ‘Tópicos colgantes y dislocaciones con clítico a la izquierda en asturiano: en defensa de un análisis paratáctico’, por Julio Villa, de la University of Manchester y la Universidá d’Uviéu. Les comunicaciones del día va ser, dende les 18.15 hores llueu d’una posa, ‘Delles notes sobre la representación gráfica de les sibilantes africaes psedorsodentales nel asturianu medieval’, de Claudia Elena Menéndes Fernández; ‘Averamientu estadísticu a la odonimia asturiana, de Víctor Suárez; y ‘Análisis pragmáticu de la unidá fresolóxica «¡calla ho!», de Llucía Menéndez Díaz, pa finar a les 19 hores con una conferencia nueva, nesta ocasión de Francisco José Fernández Rubiera, de la University of Central Florida, sobre ‘Porque non tolos ‘porque’ son asemeyaos: l’entornu causal n’asturianu’.

A les 16.30 va arrancar l’actividá’l xueves, xornada final, con Covadonga Lamar, de la University of California de Riverside, tratando sobre ‘MECA: estudiantes extranjeros y un corpus de cartas de emigrantes asturianos a América’. Les comunicaciones del día van arrancar a les 17.30 hores con ‘La obra poética n’asturianu de Fernán-Coronas: estructura y organización interna’, d’Adrián Martínez Expósito’, pa siguir con ‘Xuegos de rol: una ferramienta de democratización de la lliteratura en llingües minorizaes, por Nicolás Bardio, y finar con ‘Lliteratura infantil y xuvenil asturiana: una perspeutiva de xéneru’, a cargu de Vicente García Oliva.

Llueu d’na posa, a les 18.30 hores va poner el ramu a les XL Xornaes Internacionales d’Estudiu Paquita Suárez Coalla, de la City Universityu of New York, con ‘Ecos de la llingua a la verda’l Hudson. Un testiminiu en primera persona’. A les 19.30 hores ta programáu’l piesllu institucional.

P’acudir a esta actividá de l’ALLA ye necesario inscribise al traviés d’esti formulariu y, nel casu de ser confirmada la solicitú, habría de facese un pagu de 20 euros que se pue formalizar nel momentu mesmu de l’acreitación. Toles persones van recibir un certificáu acreitativu d’asistencia.