Les tradiciones de la estación y la música axúntense na XIX Seronda n'Aviles

Eva Tejedor & Les Pandereteres, Pandereteres de Fitoria y Dobra van actuar na carpa instalada na plaza Les Aceñes, onde nun van faltar les castañes, los tortos o la sidra del duernu.

Depués de que l'añu pasáu se retomara nun formatu reducíu, la Seronda n'Avilés torna con tol so esplendor. Güei y mañana celébrase la decimonovena edición d'esta iniciativa qu'entama Xuntanza Avilés con gastronomía, danza, productos típicos y, sobre manera, música tradicional.

La carpa abre les sos puertes a les 19 hores d'esta tarde, onde los visitantes van poder probar nel chigre xestionáu pola Asociación Cultural de Piniella castañes, sidra o tortos. La inauguración va ser a les 19.30 hores cola presencia de la Banda Gaitas El Trasno pa siguir con una muestra de baille y sones tradicionales con Xaréu d'Ochobre y Escontra'l Raigañu, y, a les 22 hores, cola actuación d'Eva Tejedror & Les Pandereteres.

Mañana l'actividá va arrancar al meudía en Les Aceñes, onde va tomar protagonismu l'asturianada a les 12.30 hores de la mano de la escuela d'Anabel Santiago. Va entamase una xinta popular con pote y arroz con lleche a les 14.30 hores y, yá de tarde, la Banda de Música d'Avilés va poner un conciertu col grupu Compañeras a les 19 hores.

El turnu de les Pandereteres de Fitoria va tocar la música d'una Nueche en Danza a les 20.30 hores, pa finar la folixa cola actuación de Dobra, grupu de Xuacu Amieva.

Na semeya, presentación de la XIX Seronda n'Avilés cola presencia d'organizadores y la conceyala de Cultura y Promoción de la Ciudá, Yolanda Alonso Fernández –tercera pela derecha–.