L'Atlético de Lugones viaxa a Ourense col suañu de recibir a un Primera en Copa

L'equipu de Primera RFEF dirixíu por Jonathan Sierra enfréntese na previa a partíu único col Barbadás, undécimu del so grupu.

La Copa arranca mañana col enfrentamientu ente los equipos aficionaos que van tener como premiu la visita d'un Primera División na primer ronda que va celebrase la fin de selmana del 13 de payares. El representante asturianu ye l'Atlético de Lugones, que va tener que competir por esti suañu fuera, a les 20.30 hores na población ourensana de Barbadás, de 11.000 habitantes, onde va haber un bona representación d'aficionaos de Llugones, con un autocar completu y persones desplazaes en coches particulares.

Ésti ye'l cuartu añu con esti formatu y nin l'Urraca, nin el Titánico nin el Nalón consiguieron el pase nes trés ediciones anteriores. Una racha qu'espera romper el conxuntu que tien Santa Bárbara como llar, que navega na parte alta de la tabla, en tercera posición con 13 puntos en 7 xornaes, a 4 puntos del líder, el Roces.

El Barbadás, mentes, milita nel grupu sur de la Preferente gallega y ta na zona media de la tabla, con 8 puntos en 6 xornaes, a 5 del líder, el Porriño Industrial. Sicasí, nun va ser un choque fácil, al ser un equipu mui físicu.

"Vamos xugar el partíu más importante de la historia del club", aseguró Sierra, que manda un "mensaxe d'ilusión". El premiu bien lo merez.

Trés equipos asturianos yá nel bombu

Nesta edición de la Copa, la centena decimonovena, cuenten yá con plaza trés equipos asturianos. Van tar nel bombu del llunes l'Uviéu y el Sporting, de Segunda División, que van xugar previsiblemente con un Tercera RFEF, y el CD Lealtad, de dicha categoría, qu'enfrentaráse con un Segunda, anque tendría pequeñes posibilidaes de cruciase con un Primera División.

Na semeya, Sierra nuna entrevista pa les redes sociales del club nun entrenamientu.