Los oficios tradicionales protagonicen un ciclu de conferencies del RIDEA

Los horros, la cerámica de Faro, la carpintería de ribera y los museos etnográficos van centrar les cuatro ponencies qu tán programaes.

'Oficios tradicionales en la encrucijada' ye'l títulu del ciclu de conferencies coordináu por Ángel Villa qu'entama'l Real Instituto de Estudios Asturianos (RIDEA). Va celebrase los cuatro xueves próximos a les 19 hores nel salón d'actos del edificiu de la uvieína plaza Porlier, con entrada llibre hasta completar aforu.

La primera va ponela l'arqueólogu Fernando Mora, de l'Asociación de Amigos del Hórreo Asturiano, col nome 'Maestros del hórreo asturiano'. Nella va falar d'esti proyeutu que se desendolcó dientro del marcu de las Ayudes pa la Salvaguarda del Patrimoniu Cultural Inmaterial que otorga'l Ministeriu de Cultura y Deporte nel que'l coleutivu punxo la mirada nes téuniques tradicionales de construcción d'estos bienes, la so tresmisión xeneracional y los sos protagonistes, los maestros del horru, un llabor esencial que consideraben necesario documentar y difundir pa poner cara a los fabricantes d'horros.

Tou ello llevóse a un documental, que se va proyeutar per primer vegada de forma pública nesta xornada. Amás, Mora va detallar l'actividá d'esti coleutivu que trabaya pa poner en valor, protexer y conservar estes estructures tradicionales.

Restu de charres

El ciclu dedicáu a los oficios tradicionales va allargase trés xueves más. El viniente va tener la participación del arqueólogu y alfareru Orlando Morán, que va presentar un 'Estudio Etnoarqueológico de la cerámica de Faro'.

Va siguir el 3 de payares l'historiador Manuel Ramón Rodríguez, que va falar a los presentes sobre 'La carpintería de ribera en Asturias. Embarcaciones de pesca: tipologías', y va finar el 10 de payares con 'Estrategias de recuperación y transmisión del patrimonio inmaterial: los oficios en los museos etnográficos', a cargu de Susana Hevia, direutora del Museo Etnográfico de Grandas de Salime 'Pepe el Ferreiro' y miembru correspondiente del RIDEA.