Rosa Rodríguez González recibió'l Premiu Muyer Rural d'Asturies 2022

Sobrescobiu acoyó los actos del Día Internacional de les Muyeres Rurales, col reconocimientu a la responsable de La Guarida del Cunqueiru como actu central del eventu.

Rosa Rodríguez González recibió'l sábadu en Rusecu'l Premiu Muyer Rural d'Asturies 2022 nuna ceremonia na que tuvo presente'l presidente del país, Adrián Barbón. "Nun podemos entender el mediu rural del sieglu XXI ensin tener en cuenta a la muyer del sieglu XXI, apoderada, consciente de los sos derechos y, como amuesa Rosa Rodríguez, con una capacidá altísima d'entamamientu", espresó'l llavianés nun discursu en castellanu dafechu.

Pela so parte, la de Trabáu, reconocida por caltener la cultura de los tixileiros dende La Guarida del Cunqueiru, asina como de la música y la llingua del país, rescampló'l papel xugáu poles muyeres "antecesores" que llucharon pola llibertá de poder tomar el rumbu deseáu na vida y apuntó que "los que vivimos nel mundu rural facémoslo porque queremos vivir ellí". Na so intervención reclamó la toma de midíes pa fixar población nos pueblos.

De manerar paralela a esta celebración entamada pola Rede Asturiana de Desarrollu Rural (Reader), con cartelería n'asturianu y alderiques nel Centru Cultural Vicente Álvarez, celebróse'l sábadu y ayeri'l I Mercáu 'Alimentos del Paraíso', qu'incluyó actividaes varies y actuaciones d'Anabel Santiago, Calea y Mina Longo. N'años anteriores el premiu de Muyer Rural d'Asturies recibiólu Isabel Álvarez Rodríguez (Ibias), Josefa Vega (Carreño), Ana Inmaculada Adeba (Villayón) y Ana Labad (Colunga).

Rodríguez López, col premiu na mano, xunto con Marcelino Marcos, presidente de la Xunta Xeneral, y Barbón a la izquierda de la imaxe. Semeya (recortada) a partir de la orixinal d'Armando Álvarez.