Queipo califica de “oportunidá perdida” el papel xugáu por Asturies, más allá de lo musical, nel Interceltique de Lorient

“Nel futuru’l Gobiernu d’Asturies, sía quién sía’l que tea nel Gobiernu, debería saber que lo que nun se debe facer foi lo que se fixo na organización d’esti añu en concretu” espresó Álvaro Queipo sobre’l LI Festival Interceltique de Lorient na Comisión de Cultura. El secretariu xeneral del PP, que tuvo presente n’An Oriant, calificó de “oportunidá perdida p’Asturies” esta edición dedicada al nuesu país.

“Tuvi la oportunidá d’asistir, de tar ehí como públicu, y tengo que decir que foi una delicia. Pa los que nos gusta la música folk, la cultura celta, el Festival de Lorient ye lo máximo qu’ún pue atopar”, principió Queipo, que rescampló’l “altísimu nivel” de toles bandes y artistes asturianos presentes, un gran papel que “contrasta col del Gobiernu del Principáu d’Asturies na organización de la so presencia nun añu que s’organizaba n’honor a Asturies. Esto pudi vivilo en primer persona y ye un comentariu que se sentía nel propiu festival”.

Nesi sen, fixo referencia a un análisis d’esta edición del Interceltique fecha pol periódicu bretón ‘Le Télégramme’ nel que se facía referencia al pabellón d’Asturies como “floxu”, comparándolu col de Galicia, mui animáu los 10 díes del festival. “Desaprovechamos por completo una oportunidá, que se da cada mui pocos años, de promocionar y de dar a conocer Asturies, la so cultura, la so riqueza, el so patrimoniu, la so gastronomía… Porque too ello forma parte de tol bagaxe cultural y la identidá asturiana, y aquello podría aprovechase d’otra manera pa que los asturianos tuviéramos verdardermente arguyosos del nuesu papel y dar a conocer la nuesa tierra. Y eso nun asocedió”, aseguró.

Queipo siguió apuntando que’l Gobiernu, “magar que l’apaición de Barbón con capa y montera picona, con tou’l nuesu respetu pa la capa y la montera picona, foi mui llamativa, nun foi pa nada una presencia notable y de calidá. Foi una oportunidá perdida p’Asturies que dende’l nuesu grupu parllamentariu llamentamos fondamente”. “Nel futuru’l Gobiernu d’Asturies, sía quién sía’l que tea nel Gobiernu, debería saber que lo que nun se debe facer foi lo que se fixo na organización d’esti añu en concretu”, finó la so intervención.

El pabellón de Galicia, por iniciativa privada

Na so réplica, la conseyera de Cultura, Política Llingüística y Turismu, Berta Piñán, que nuna primer respuesta a la entruga plantegada pol PP “sobre cómo califica el papel del Gobiernu del Principáu d’Asturies na organización del Festival de Lorient nel añu dedicáu a Asturies”, aseguró que’l “Gobiernu tuvo al altor de la responsabilidá que suponía qu’Asturies fora l’invitáu d’honor nel que l’añu nel que volvía la normalidá nel festival”, pa depués detallar la programación cultural desendolcada, entamó respondiendo a Queipo que Galicia nun tenía pabellón n’An Oriant. “Había un restorán que nun yera pabellón de Galicia”, recordó, instaláu pola empresa Pulpalia ensin intervención de la Xunta.

Sobre l’ausencia de restorán nel pabellón d’Asturies argumentó que “sacamos hasta trés vegaes la llicitación y les trés vegaes quedó vacía –n’An Oriant Piñán aseguró a Asturies.com que foron cinco– con unes condiciones más que favorables, y yo como conseyera, nin nengún gobiernu, pue obligar a empresarios asturianos a dir con un restorán a Lorient”. “Tuvimos que reinventanos nesa situación tan complicada y contratar escanciadores de sidra y contar con productos asturianos pa vender”, añadió.

Por último, defendió que “en toles partes taba Asturies”, faciendo referencia a la presencia del país nun millón y mediu de vasos del festival. “El retornu taba per toles partes, non sólo en que la xente pare a comer dalgo ellí”, argumentó.