“El Día de la Reciella nun busca convertir l’asturianu nun tema, sinón nuna forma de comunicase”, apunta Guardado

Entama la cuenta atrás pal IX Día de la Reciella, que se celebra esti sábadu nel Muséu del Pueblu d’Asturies. Esti miércoles presentóse na Casa Conceyu de Xixón l'eventu, actu nel que David Guardado, representante de Reciella, rescampló qu’esta xornada “nun busca convertir l’asturianu nun tema, sinón nuna forma de comunicase”.

Dalgo que pue vese echando un güeyu al ampliu programa preparáu, onde “nun hai nada sobre l’asturianu. Lo qu’hai ye mui variao, pero ye n’asturianu”, añadió. Ésti va arrancar a les 11.30 hores –l’apertura de puertes va ser a les 11– con un averamientu al axedrez cola collaboración de Belarmino García Suárez (Club Antonio Rico) y la Oficina de Normalización Llingüística de Xixón y va pesllase a les 19 hores cola danza prima; un total de 8 hores d’actividaes col asturianu como llingua vehicular.

“Combina coses d’otros años, que funcionaron bien y que prestaron a la xente, y coses nueves”, rellata esti padre que forma parte de la Comisión Organizadora compuesta por unes quince persones, anque’l sábadu van ser cerca del centenar les que van participar de manera totalmente voluntaria, al igual que tolos coleutivos qu’entamen les actividaes de baldre “al entender que l’oxetivu d’esti día, la visibilización del asturianu como una forma de comunicación y la tresmisión xeneracional, ye una causa que merez la pena”.

Les novedaes principales son una pinchada didáutica de música xamaicana entitulada ‘Ximielgando cola reciella (13.30 hores) por parte del programa ‘Ximiélgalo Radio Show’ de Radio Kras, un desfile de moda entituláu ‘La tradición ye la inspiración’ (16.15 hores) con comentarios n’asturianu a cargu de Ringo Rango que va tresmitir en direuto Nordés Móvil o un taller d’introducción al TikTok pa mayores de 13 años (17.30 hores) con Cuatro Gotes, pero repiten otres como l’axedrez, el cosplay (17 hores) con Shiro Ychigo o’l valtu (12.30 hores) cola Federación de Lluches Olímpiques y DD AA del Principiáu d’Asturies.

Amás va haber un mercadín de lliteratura, música y moda cola presencia de La Fabriquina, Pintar-pintar, Ringo Rango, Puru Remangu, Músicasturiana, Impronta, Días Adulces y Trabe, espacios de la Oficina de Normalización Llingüística de Xixón y Acuto Xuegos, y un chigre con comida y bébora.

“Como asociación lo que pretendemos ye que l’asturianu sía una llingua que siga falándose; una llingua que sía una más en casa”, apunta Guardado, qu’añade que “lo que queremos tamién ye que la socialización n’asturianu se visibilice de dalguna forma nesti día nun entornu festivu, d’ociu, deportivu y de celebración” abiertu a toles familes, yá que toles actividaes son de baldre.

Va poner el ramu a la xornada un conciertín d’Alfredo González, que va tocar temes suyos n’asturianu y ‘L’asturianu conéctate’, el cantar que compunxo pa esta edición del Día de la Reciella. “Con esti lema queremos reivindicar la necesidá de conteníos en plataformes dixitales n’asturianu, porque la socialización de los nuesos neños y neñes muévese en YouTube y nesi contestu. Necesitamos conteníos n’asturianu, pero tamién reivindicar que l’asturianu ye una forma de coneutase en familia, con amigos y con amigues”, esplica’l representante de Reciella.

Una llingua “na que vivir”

Guardado tuvo acompañáu na presentación por Miguel Barrero, direutor de la Fundación Municipal de Cultura, Educación y Universidá Popular , y por Antón García, direutor xeneral de Política Llingüística. El periodista y escritor aseguró que “el coleutivu ‘Reciella. Families pol Asturianu’ nació cola idea de mostrar dalgo que ye mui obvio pero qu’entovía hai que repetir, que ye que la llingua asturiana nun ye namás una llingua na que falar, sinón tamién una llingua na que vivir. Y ye bien importante que los neños y les neñes vean dende les primeres edaes como esa llingua sirve pa manexase en tolos ámbitos de la vida”.

Amosó’l sofitu del Conceyu a esta iniciativa porque “lo que fai ta acorde colo que facemos dende la propia Alministración pa normalizar l’usu del asturianu na sociedá xixonesa” y rescampló la participación de la Oficina de Normalización Llingüística na xornada. Asina, el SNL collabora cola actividá d’axedrez y va contar con un puestu “con información sobre la propia llingua asturiana y sobre les actividaes que desendolca a lo llargo del añu”.

Pela so parte, García, señaló que “l’exemplu de ‘Reciella. Families pol Asturianu’ ye pioneru” tanto no que se refier a la reivindicación llingüística como no que tien “de celebración, de poder axuntar a un grupu de persones alredor de la llingua asturiana”. Nesta ocasión el Día de la Reciella cuenta con apoyu económicu de la Conseyería de Cultura, Política Llingüística y Turismu, y l’escritor aseguró “que queremos abrir una collaboración con Reciella que permita qu’esti Día de la Reciella vaya creciendo n’ediciones socesives”.

Na semeya, García; Barrero; Raquel Prendes, de 'Reciella. Families pol Asturianu; y Guardado.