VOX queda solu pidiendo'l desaniciu de la política llingüística

L'únicu diputáu que nun votó en contra de la propuesta foi Pedro Leal, que s'astuvo.

Siguiendo cola so cruzada contra la llingua asturiana, VOX presentó una propuesta de resolución nel Alderique d’Orientación Política Xeneral del añu llexislativu 2022-2023 pa dexar ensin ayudes al asturianu. En concreto buscaba encamentar al Gobiernu a "eliminar toles partíes destinaes nos Presupuestos Xenerales del Principáu d'Asturies a la política llingüística, destinando dicho presupuestu a fomentar cualquier tipu d'actividá artística y cultural, ensin el privilexu esclusivu de la 'Llingua'", y "eliminar la Direición Xeneral de Política Llingüística".

Tamién solicitaba afalar al "Gobiernu de la Nación a que garantice'l derechu a ser educáu n'español en tol territoriu nacional, asina como'l deber de tolos españoles de conocer la llingua común". Estos pidimientos nun contaron col sofitu de nengún de los partíos de la Xunta Xeneral, que votaron en contra.

Asina rexistróse 1 'sí' –Ignacio Blanco nun votó– y 41 'non', amás de l'astención de Leal, diputáu espulsáu por Foro. En total hebo 43 de los 45 votos posibles.