Reconstitúise'l Conseyu d'Estudiantes de la Universidá d'Uviéu llueu d'un procesu eleutoral

Resultaron escoyíos Jesús Vera como presidente, Eloy Eyaralar como ayalgueru y Andrés Fernández Menéndez como secretariu.

El martes, de manera telemática, celebráronse les eleiciones al Conseyu d'Estudiantes de la Universidá d'Uviéu, que llevaba práuticamente inactivu cerca de 3 años. D'esta forma reconstitúise'l máximu órganu de representación estudiantil na institución.

Güei proclamáronse los miembros eleutos a presidente, ayalgueru y secretariu, que resultaron ser Vera (Facultá de Formación del Profesoráu y Educación), Eyaralar (Escuela d'Enfermería de Cabueñes) y Fernández Menéndez (Facultá de Filosofía y Lletres). Toos ellos son miembros mozos de la comunidá universitaria, asina como la gran parte de representantes que sofitaron la so candidatura, produciéndose asina'l relevu xeneracional del estudiantáu na política universitaria.

"Queda emtá muncho por facer pa que se recupere una dinámica de vitalidá y operatividá, mesmo nel Conseyu d'Estudiantes como na riestra d'escalafones de la representación, pero gracies a esti procesu electoral dase'l pasu primeru nesa direición", apunten los representantes eleutos, que lleguen con optimismu firme y el propósitu claru "de trabayar en pro de la comunidá universitaria, garantizando la tresparencia, la democracia y el respetu a la pluralidá y independencia de los representantes". Ente los sos pruyimientos más importantes ta "dinamizar la vida cultural universitaria, da-yos voz a los alumnos de les fasteres rurales, defender les llingües llariegues asturiantes y promover l'espíritu críticu y la participación nes instituciones de los estudiantes; el grupu mayoritariu na nuesa Alma Máter y por embargu'l que menos procuru pon nes ferramientes de representación".

Na imaxe, Vera, Eyaralar y Fernández Menéndez.