Barbón emplegó per 2 minutos y 3 segundos les llingües propies na so intervención

El so discursu na primer sesión del Alderique d'Orientación Política Xeneral na Xunta allargóse per 1 hora y 20 minutos.

El presidente Adrián Barbón tornó a emplegar l'asturianu y el gallego-asturiano na so intervención –na del 2020 usó los dos idiomes, pero na del 2021 nun utilizó l'eonaviego– d'esta mañana. Un xestu del socialista pa les llingües propies del país, anque de calter simbólicu, yá que'l total de tiempu qu'emplegó foi de 2 minutos y 3 segundos: 1 minutu y 3 segundos, y 1 minutu xustu, de manera respeutiva.

Les pallabres nel idioma del occidente díxoles poco depués de les que dio n'asturianu, na parte final del discursu na estaya 'El diálogo y la empatía como herramienta de gobierno'. En concreto no que se refería a 'A voluntá de diálogo y acordo'.

"A llista de pactos alcanzaos este trienio é grande, dende a concertación al consenso sobre financiamento autonómico ou el aprobación de tres presupostos seguidos. A capacidá d’entendemento impúxose ás discrepancias ideolóxicas en beneficio da ciudadanía, como pasóu coa firma del protocolo sobre os tarréis da Vega entre el Ministerio de Defensa, el Conceyo d’Uviéu y el Goberno del Principao. Hai quen pensa qu’a política namáis se pode xugar sobre el tarrén embarrao da crispación y a polarización. É evidente que nun lo comparto. Gústame a política útil, a que facilita a colaboración y a solución dos problemas. Por eso insisto en que temos que xuntarnos pra manter el Principao a salvo del clima tóxico que tan a miudo se respira na política nacional. Paréceme que lo tamos conseguindo y opino, con sinceridá, qu’é un acerto colectivo", espresó Barbón.