Cuadongues y Pelayos republicanos: miraes dende l’exiliu asturianu

Esti testu ye un estractu del llibru de próxima publicación 'Nunca Vencida. Mitu, ideoloxía, discursu, y contestu nes llectures sobre Pelayo, Cuadonga y la identidá asturiana na historia'.

En 1888, l’abogáu Juan Fernández Llana participaba nun actu n’Uviéu nel que defendía la república como forma de gobiernu. L’uvieín xustificaba’l predicamentu de les idees republicanes n’Asturies afirmando que los asturianos yeremos antiguos demócrates porque la democracia entamara en Cuadonga, un llugar nel que los montes miraben al cielu, como la llibertá, y non como les monarquíes, que miraben a los abismos.

L'apellación de les corrientes demócrates y republicanes a la mitoloxía y los símbolos d’Asturies, y en concreto Pelayo y Cuadonga como exemplos de llucha pola república, nun yera infrecuente nel XIX. De fechu, recordaba Julio Somoza, la milicia democrática xixonesa nel tiempu de la revolución Gloriosa de 1868 tenía como símbolu identificador una bandera morada, "emblema de la federación republicana", con una imaxe de Pelayo nel centru. La bandera cola "cruz de Pelayo” sobre fondu azul, esto ye, l’asturiana, adaptada sobre un color encarnáu que representaba la revolución, foi tamién la que s’izó nel Ayuntamientu d’Uviéu al proclamase la primera república, la federal, en 1873.

Pero l'usu de la iconografía pelagiana y cuadonguista foi quedando arrequexada na izquierda y nel republicanismu nes primeres décades del sieglu XX, cuando ye capitalizada principalmente pol nacional-catolicismu, pero tamién pol nacional-lliberalismu, qu’intenten asociala a una idea d’estáu unitariu, monárquicu y, nel primer casu, confesional, nun momentu de grave crisis del réxime de la Restauración borbónica.

Sicasí, cola llegada de la Guerra Civil, la narrativa republicana n’España recupera’l discursu de la llucha contra la invasión estranxera, que representaben agora los alemanes, italianos y “moros” que lluchaben al llau de los sublevaos, y los principales símbolos de la historiografía lliberal del XIX, “Reconquista” y “Guerra de la Independencia”, vuelven a resignificase dende la izquierda pa que sían funcionales nuna situación na que l’ataque a la República se presenta como una agresión esterna.

Y nesi contestu, al que s’asocia’l recuerdu recién de la revolución del 34, Asturies pasa a tener un papel protagonista. Como ún de los exemplos más significativos, podemos falar del saludu que n’ochobre de 1937 la líder comunista Dolores Ibarruri mandaba a Asturies en nome del Comité Central del PCE, nel que comparaba la “Asturias de la Reconquista” cola de “las gestas gloriosas de Octubre”, y pidía-yos a los asturianos, que malapenes resistíen yá la ofensiva franquista, una nueva “¡Covadonga de la Reconquista de España para la Libertad, para la Paz, para la Justicia, para el Progreso!".

El discursu sobre Pelayo y Cuadonga en clave progresista y antifascista tendrá amás una formulación específicamente asturiana tres de la revolución de 1934, cuando se llegará a falar del líder socialista revolucionariu, Ramón González Peña, como un nuevu Pelayo  y tamién na narrativa de la prensa venceyada al Conseyu Soberanu nel 37, como les cróniques de Juan Antonio Cabezas en Avance, onde se plantegará tamién la resistencia al golpe d'estáu como una continuación de la “lucha por la independencia de Asturias” frente a los invasores estranxeros, apelando al mitu de l’Asturies nunca vencida como elementu de movilización.

Miraes dende l’exiliu asturianu

La victoria franquista xenerará miles de desplazaos y d’exiliaos asturianos, ente ellos dellos escritores que, nes sos obres, caltendrán el discursu d’una Asturies perdida, afogada pol franquismu y la represión. En delles de les sos producciones podemos atopar la utilización de los llugares comunes sobre’l país, colos que caltienen un rellatu que representa un llamentu por un presente escuru y la esperanza d’un futuru nel qu’Asturies recupere la llibertá.

Ángeles López-Cuesta, Emilio Palacios, Matías Conde, o Alfonso Camín serán dellos de los que cantarán a esa Asturies martir y sometida pol fascismu con referencies a la so llingua, la so música, a la so naturaleza inespugnable, a Pelayo y a Cuadonga,… y, en definitiva, apellando a la historia y la identidá d’una Asturies dominada pero, acordies col mitu secular, nunca vencida dafechu.

López-Cuesta, ye la escritora qu’ayudó a custodiar la imaxe de la Santina en Cuadonga na guerra civil como parte de la política de les autoridaes asturianes destinada a la protección del patrimoniu. La nieta de Teodoro Cuesta y muyer de Luis Laredo, diputáu d’Izquierda Republicana, dedíca-y un poema en 1946 a José Maldonado, ex conseyeru d’Obres Públiques del Conseyu d’Asturies y Lleón, y a los asturianos refuxaos en Francia, nel qu’escribe con señardá sobre Asturies cola convicción de que dalgún día volverá l’Asturies real, l’antifranquista, que se reclama sucesora de Pelayo, y Asturies recibirálos nel Auseva con una gaita que llorará

“polos hermanos Astures/ muertos llonxe de so tierra” y “esi día, tai seguros/ Pelayo’l sepulcru dexa/ pa salir a recibinos/ y cola cruz ena diestra/ respigaráse orgullosu/ al ver la so descendencia”.

Ún d’esos asturianos exiliaos en Francia ye Emilio Palacios qu’en 1939 escribe Catalán de les estrelles, un poema dedicáu al Canigó, el monte sagráu de los catalanes, nel que describe la xermandía y l’amor ente los pueblos asturianu y catalán, xuntos nel sufrimientu que provoca’l sometimientu fascista, porque, escribe Palacios,

“Asturies y Cataluña/ son dos pueblos de valientes/ hoi con corona d’escayos/ florecía de llaureles”.

Palacios entrúgase nel poema qué diría Pelayo si resucitare y viere la situación d’una Asturies invadida.

Nun poema dedicáu años depués, en 1958 a Alejandro Casona, Palacios seguirá usando la figura de los moros, que representen al franquismu y a Franco, y tamién se llamentará de la falta d’un Pelayo que llibere Asturies.

Asturies nun ye quien yera/ hogaño enllena de moros/ ¡traidor el que los traxera,/ y endín pelos cuatro llaos/ Ay señor ¿quién lo dixera?/ ¡¡Si aquel bon rei Don Pelayo/ llevantara la cabeza!¹

Otru asturianu exiliáu, Matías Conde, escribirá dende México Sol en los pomares, una obra que reeditó n’Asturies l’IDEA en 1976 suprimiendo ún de los poemes nel que se fala d’Asturies como un territoriu nunca mancilláu polos invasores qu’agora representen la guardia civil y “los moros”, que se consideró ofensible pal cuerpo armáu.

Tricornios de los ceviles,/ negros tricornios, más negros/ que la cara de los moros/ que vinieron de tan lexos/ a manchanos esti suelu/ qu´enxamás pisaron “perros”.

Pero foi Alfonso Camín, quien retrató como nengún la barbarie de los vencedores de la guerra n’Asturies usando dellos de los llugares comunes, y tamién tópicos que malapenes resisten el pasu del tiempu, rellacionaos cola identidá asturiana, relleendo en clave republicana’l mitu de la independencia d’Asturies y rellacionando l’antigua mitoloxía colos símbolos nuevos de l’Asturies del sieglu XX, como la mina y la llucha obrera.

Nún de los sos poemes escritu en 1938, Romance de Villafría, que fala de la represión tres de 1934, atopamos xuntos a Cuadonga, Pelayo y la mina y los mineros como representación d’una Asturies derrotada polos invasores que representen unos “moros” usaos, otra vuelta, como metáfora del fascismu. Nel poema apaez el deséu de la vuelta d’otru “Pelayo, capitán de la Santina” que sustituya les piedres de la batalla de Cuadonga por “cartuchos de dinamita” pa llibrar Asturies d’esos nuevos invasores que volvieron agora dende Castiella.

dicen que “todos ser rojos”
los que llevamos boína;
que a matar pelayos vienen,
aunque no tengan “fusila”,
y con la sangre hasta el codo
hunden el arma homicida. [...]
¡Qué falta de otro Pelayo,
capitán de la Santina,
ahora que van en las ondas
cartuchos de dinamita!
¡Mineros de Covadonga,
con el corazón por mina:
será vuestra la montaña
de estrellas que hay allá arriba!

El propiu Camín entrevistaba a González Peña en 1938 en México² y esti dicía-y qu’Asturies taba invadida y secuestrada por alemanes, italianos y rifeños, pero nun taba vencida, porque n’Asturies nin siquiera los muertos de la represión se resignaben a ser esclavos y “andan de noche”, llibres pelos caminos, nuna referencia mitolóxica a la Güestia.

El dirixente socialista recordába-y amás a Camín la tradición revolucionaria y democrática d’Asturies y un marcáu espíritu “regional” y de llucha pola independencia, lo que facía que, horrorizada poles monstruosidaes de los invasores, “hoy Asturias es infinitamente más nuestra que ayer”.

González Peña, espláyase falando del popular tópicu de "los moros", que nun hai dulda de que yera una ferramienta política funcional nesi momentu, por más qu'al lleer agora les sos pallabres nos paeza un discursu (con fluecos xenófobos, sexistes, homófobos...) imposible de tresportar al nuestru tiempu, y contesta-y a Camín qu'igual qu’a los “moriscos” yá los echara “Pelayo a estacazos y a pedradas desde las montañas de Covadonga”, Asturies volvería a ser lo que yera, cuando se lliberara, como fixera ocho sieglos atrás, de la invasión que representaben agora les tropes golpistes y los sos aliaos internacionales.

Ye mui probable que nengún d’ellos pudiere sospechar, nin na más pesimista de les sos previsiones, qu’esa nueva invasión, non precisamente lliderada polos moros, venía pa quedar munchos años.