El sector turísticu algama cifres espectaculares esti 2022: 3 millones d'agospios en siete meses

En xunetu hebo un 9,3 por cientu más de visitantes que nel mesmu mes del añu pasáu.

El turismu n'Asturies ta algamando cifres espectaculares esti 2022. El país rexistra máximos históricos nos siete primeros meses depués d'un xunetu tamién de récor, tanto en visites como n'agospios.

En total el mes pasáu hebo 404.431 turistes que xeneraron 1.215.123 estancies, lo que supón un incrementu del 9,3 y del 8,4 por cientu, de manera respeutiva, en comparanza a xunetu del 2021, añu que, hasta la fecha, contaba con los rexistros más altos para esi mes. Amás, gracies a estes cifres, Asturies superó per primer vegada los trés millones d'agospios en siete meses.

En total son 3.058.061 que xeneraron un total de 1.263.679 viaxeros en tou tipu d'establecimientos turísticos (hoteles, apartamentos, campings, negocios de turismu rural y albergues). Estos datos suponen un crecimiento del 81,4 por cientu en turistes y del 64,5 por cientu n'estancies sobre'l mesmu periodu del añu pasáu.

El 20 por cientu, turismu internacional

L'Instituto Nacional de Estadística (INE) espublizó güei estes cifres, qu'inclúin establecimientos non hoteleros y completen el cómputu de xunetu llueu de la espublización la selmana pasada de los datos d'hotelería, tamién con los númberos más altos de la serie histórica. No que respeuta al turismu internacional, ye un 20 por cientu mayor qu'en xunetu del 2019 y duplica la cifra del añu pasáu al resxistrase un total de 82.251 turistes y 190.645 agospios, representando un 20 y 15,7 por cientu del global, de manera respeutiva.