Les Xornaes Elías García d'homenaxe al músicu y ornitólogu van celebrase del 16 al 18 de setiembre

Villaviciosa va acoyer del 16 al 18 de setiembre les Xornaes Elías García que sirven d’homenaxe al músicu y ornitólogu coincidiendo col tercer aniversariu de la so perda. Una esposición, un congresu d’ornitoloxía, un taller de dibuxu de páxaros, una plantación de monte autóctonu y conciertos, con participación de Llan de Cubel y Felpeyu, componen el programa entamáu por collacios y familiares del artista.

Previstu nun primer momentu nel 2020 pal cabudañu, la pandemia de COVID-19 foi obligando a los sos promotores a retrasar la celebración de les Xornaes Elías García pa poder desendolcales con toa normalidá ensin esviase de la idea orixinal. Finalmente, nesti tercer aniversariu, esti proyeutu fechu con tol ciñu del mundu y de manera desinteresada va ser una realidá: “La xente que lu conoció y que lu quixo col alma queremos celebrar la so vida y tolo que-y debemos nunos actos qu’axunten les coses que más lu representen como profesional y como persona”, apunten.

La música y la ornitoloxía, dos aspeutos nos que rescampló enforma, van protagonizar los eventos que se pongan en marcha esa fin de selmana en Villaviciosa en collaboración col Conceyu, llugar escoyíu “pola importancia que tuvo La Ría na actividá ornitolóxica d’Elías”. “Participó nos proyeutos musicales más importantes de la historia de la música folk y tradicional d'Asturies y en campu de la ornitoloxía tuvo al frente de les publicaciones asturianes más relevantes del so tiempu”, rescamplen los organizadores, un llabor que van poder conocer los visitantes a la esposición sobre la so vida y obra que va abrir les sos puertes una selmana enantes de les propies xornaes, el día 9, nel Atenéu Obreru de Villaviciosa con horariu de 17.30 a 19.30 hores, que se va ampliar el 17 y 18, día últimu de la muestra, pela mañana de 11 a 13.

VII Xornaes Ornitolóxiques Cantábriques

L’Atenéu Obreru tamién va acoyer les VII Xornaes Ornitolóxiques Cantábriques, que se centren na avifauna d’Asturies, en particular, y na ornitoloxía del territoriu eurosiberianu de la Península Ibérica, en xeneral. Van abrise’l vienres 16 a les 17 hores y allargase hasta’l día siguente, y va contar cola presencia de Magnus Robb, Mar Delgado, Daniel García y Daniel López-Velasco.

El congresu va incluyir ponencies sobre’l llabor científicu d’Elías y una clas maxistral del escocés Robb, especialista mundial en cantares de páxaros. El domingu 18 ta programada una salida de campu per La Ría.

La participación nestes xornaes ye de baldre, pero ye necesario inscribise de manera previa. Tamién va selo el taller de dibuxu y iniciación al cuadernu de campu ornitolóxicu que va tener llugar el sábadu a les 12 hores empobináu pa neñes y neños mayores de 10 años, anque ensin llende d’edá.

Nesta actividá hasta 15 persones van poder iniciase mano del biólogu, naturalista, pintor y ilustrador Gonzalo Gil nesti llabor. La xente interesao pue apuntase al traviés del corréu eliasxornaes@gmail.com indicando nel asuntu ‘Taller’.

Desocalotización y actuaciones de Llan de Cubel y Felpeyu

El domingu 18, pela mañana, va celebrase tamién un actu de desocalotización y plantación coleutiva de monte autóctonu nuna finca d’Espina de la contorna de La Ría, na parroquia de Seloriu. Pa participar tamién hai qu’escribir al corréu electrónicu especificando ‘Plantación’.

La música, como nun podía ser d’otra manera, va xugar un papel protagonista nes Xornaes Elías García. Asina’l sábadu, na Plaza’l Güevu siempre que’l tiempu acompañe –de nun ser asina pasaríase al Teatru Riera–, van actuar la Banda de Gaites Villaviciosa, Mariluz Cristóbal Caunedo, Xuacu Amieva, y Ambás y Ramsés a partir de les 20.30 hores.

Yá’l domingu, nel Riera, van xubise al escenariu a partir de les 19 hores La Garrapiella, Loína, Herbamora, Llan de Cubel y Felpeyu. P’acudir a esti conciertu, tamién de baldre, ye necesario retirar entrada al traviés de la web, procesu que se va activar el llunes 12 de setiembre.