“Esto nun apara equí, vamos llevar les firmes contra los eventos taurinos a la Xunta Xeneral”, avisa Fernández

Esti sábadu, magar les acusaciones d’irregularidaes y les 50.000 firmes recoyíes en contra, van matase gües en Benia sacante sorpresa d’última hora. L’únicu eventu taurín que se celebra n’Asturies sigue alantre mientres Gobiernu y Conceyu d’Onís pásense la pelota sobre l’autorización del eventu que va tener llugar nuna plaza portátil.

Alredor de les 11 hores d’esta mañana l’asociación protectora d’animales Huella del Sella llevó al Rexistru Municipal les 49.000 firmes algamaes na campaña ‘No a la corrida de toros en Onís. Asturies libre de maltrato animal para siempre’ entamada na plataforma dixital Change.org, que nel momentu de la redaición d’esta noticia yá taba en 49.352 sofitos. Ellí recibiólos l’alcalde, el socialista José Manuel Abeledo, que presentó a los representantes del coleutivu diversu papeléu y dio esplicaciones que nun acabaron de convencer.

“Escurrió’l bultu”, opina Marisa Fernández, secretaria d’Huellas del Sella, que, sicasí, valora’l xestu del primer edil de recibiles. “Esplicónos qu’él nun dio autorización, qu’eso ye competencia autonómica, y que de prohibir la celebración de la corrida podría prevaricar”, rellata.

Una posición diferente a la dada pol equipu xurídicu de la Conseyería de Presidencia, que treslladaba estos díes a l’Asociación Nacional Animales con Derechos y Libertad (ANADEL) que yera’l Conceyu d’Onís el que lo autorizaba. En concreto, dábase pasu a una “autorización pa plaza de toros portátil y corrida de toros con aforu pa 2700 persones” que cuenta con irregularidaes, según denunciaba ayeri Podemos, formación que responsabiliza al Gobiernu “de cualquier consecuencia o suceso que pueda derivarse de la celebración de la corrida de toros de Benia”.

“La llexislación esitente nun recueye la celebración d’estos eventos en places portátiles”, recuerda Fernández, mesmu argumentu defendíu por ANADEL, xunto col de la seguridá ciudadana, pa que se revoque’l permisu. “Ye un pueblu de 600 persones, 800 en tol conceyu, y pretenden meter 2.700 persones nuna plaza portátil de 3.000 onde va haber 6 gües bravos”, argumenta la representante d’Huellas del Sella.

Nun pierden la esperanza de frenar la corrida

A 24 hores de la celebración de la corrida, too sigue’l so cursu, anque Fernández nun pierde la esperanza y siguen esplorándose víes pa frenar l’eventu. Otra manera, delles asociaciones –ente les que nun ta Huellas del Sella– convoquen una concentración a les 17.30 hores, 30 minutos enantes de la corrida, nun parque enfrente de la finca Morán, pasando la carretera, p’amosar la so disconformidá por esti ‘festexu’ taurín y contra’l maltratu animal.

Pase lo que pase mañana, l’asociación protectora del oriente va siguir cola campaña actual que yá acumula 50.000 sofitos. “Esto nun apara equí, vamos llevar les firmes contra los eventos taurinos a la Xunta Xeneral en setiembre. Hai qu’emburriar ente toos pa cambiar la situación, porque esto va volver, en Benia o en Xixón, onde yá amenacen con otra corrida n’ochobre n’otra plaza portátil nuna finca privada”, alerta.

Na semeya, momentos previos a la entrega de les firmes na Casa Conceyu d'Onís.