“Hasta que nun lo ves, nun dimensiones lo que ye esti festival intercélticu”, apunta Piñán

Dende’l sábadu 6 al martes 9 tuvo presente en Breizh la conseyera Berta Piñán, “una esperiencia impagable no coleutivo y non personal”. “Hasta que nun lo ves, nun dimensiones lo que ye esti festival intercélticu”, afirmó la responsable de Cultura, Política Llingüística y Turismu, que confirma l’apoyu futuru pa la delegación asturiana d'un certame del que salen tamién alcuerdos comerciales.

La escritora declaró a Asturies.com que “venimos apostando fuerte” al Festival Interceltique de Lorient na edición na qu’Asturies ye convidada d’honor, un compromisu algamáu con Lisardo Lombardía, ex direutor del certame, y Iñaki Santianes, responsable de la delegación asturiana, al que se sumó’l presidente Adrián Barbón, que’l martes pasáu tamién se desplazó hasta An Oriant. “Ye’l festival intercélticu más grande del mundu, non sólo d’Europa, y ye grande en tolos sentíos”, añadió Piñán, que recordó la importante promoción que supón pal país la presencia “nel cartelu, que ta en toles partes, y en tolos vasos del festival, que la xente lleva pa casa. Va haber un millón de vasos nes cases de Francia y d’otros países d’Europa tol añu, con Asturies, la imaxe del Picu Urriellu, los gaiteros nuestros… Ye una promoción impagable, como va poco dicíame’l gaiteru Hevia”.

“Ye una ventana al mundu. Ye un apoyu a la nuestra música, a la música tradicional y a la música proyeutada hacia’l futuru, pero tamién una ventana a la promoción turística”, siguió la conseyera, la primera qu’acude al festival a sofitar a la delegación asturiana. “Una vegada vienes equí nun comprendes por qué nun se vieno enantes. Nós dende’l principio de llexislatura tábemos mui comprometíes con Lorient, pero depués vieno’l COVID y tolo que sabemos. Ye’l primer añu que se celebra con normalidá depués de la pandemia, y ye una apuesta turística, pola promoción como motor económicu”.

Asina apuntó que “falando col alcalde y otros representantes de Bretaña alcordamos alcuentros de promoción comercial, turística y económica atlántica”. Pa finar, entrugada pol sofitu futuru a la delegación, confirmó que “sí, queremos tar apoyando a la música tradicional asturiana y a la música que se presenta equí”.