Barbón y Revilla inauguraron a pie'l Camín de los Santuarios

Esta ruta ente Llébana y Uviéu, con pasu per Cuadonga, ábrese pa conmemorar los 1.300 años de la batalla nel monte Auseva.

Los presidentes d'Asturies y Cantabria, Adrián Barbón y Miguel Ángel Revilla, de manera respeutiva, inauguraron ayeri'l Camín de los Santuarios, un percorríu nuevu inspirada nel históricu qu'enllaza Santu Toribio de Llébana con Cuadonga y la catedral d'Uviéu, trés fitos fundamentales na historia de la monarquía asturiana. Acompañaos de la conseyera de Cultura, Política Llingüística y Turismu, Berta Piñán, y más autoridaes y alcaldes de los conceyos pelos que pasen (El Valle Altu de Peñamellera, El Valle Baju de Peñamellera, Cabrales, Onís, Cangues d’Onís, Parres, Piloña, Nava, Noreña, Siero y Uviéu), fixeron a pie'l trayeutu que va dende la llende con Cantabria hasta Merodio, onde Toño Huerta guió a los presentes pel llugar calcando nos elementos arquiteutónicos y etnográficos principales.

Esti camín constitúi un recursu cultural y turísticu nuevu que pretende poner en valor los elementos patrimoniales, naturales y etnográficos esistentes nos sos 200 quilómetros de llargor, col enfotu de convertise nun referente dientro de los itinerarios culturales europeos. La so apertura coincide cola cercanía col setentenu cuartu Añu Xubilar Llebaniegu, na que va abrise la Puerta del Perdón de Santu Toribio, colo que la ruta tendrá un atractivu añadíu nel 2023.

Aplicación n'asturianu

La empresa Where is Asturies desendolcó, por encargu de la conseyería, una aplicación pa dispositivos móviles pa facilitar información sobre'l Camín de los Santurios a los pelegrinos. Ésti ta disponible n'asturianu, castellanu, inglés y francés, y ente les sos funciones ta la consulta de mapes, guía de conseyos, itinerarios, datos sobre les etapes, distancies y puntos d'interés, amás d'accesu a información meteorolóxica, un diccionariu con frases pa ser llocutaes pol propiu programa o un diariu de ruta.

Na semeya, Barbón señala a Revilla un mapa d'un panel informativu con testos en trés idiomes, ente ellos l'asturianu, con Piñán xunto al mesmu.