Eivissa lleva a les sos fiestes la reivindicación llingüística del asturianu de la mano de Dixebra

Un alderique sobre la situación de la llingua asturiana y del movimientu de reivindicación llingüística y un conciertu de Dixebra van tener güecu na programación de les Festes de la Terra. L’Ajuntament d’Eivissa vien poniendo estos años el focu de les sos fiestes nun fechu llingüísticu, nesta ocasión centráu n’Asturies.

La capital de la islla recibe per primer vegada a Dixebra, qu’anteriormente tocara en trés ocasiones na vecina Mallorca. Va ser esti domingu, na viéspora del día grande de les Festes de la Terra, a les 22.30 hores, nun escenariu que previamente va ocupar Pvssydònia, grupu punk llocal compuestu por cuatro moces.

La Xornada pola Oficialidá de la Llingua Asturiana, como anuncia l’ayuntamientu, complétase con una presentación del discu-llibru de Dixebra ‘Ente la niebla’ por parte del cantante Xune Elipe y una charra-alderique sobre la situación del idioma a les 19 hores na Biblioteca Municipa d’Eivissa. “Toi preparando un PowerPoint col que voi esplicar qué ye la llingua asturiana, el dominiu llingüísticu…, y, sobre manera, tol tema de la reivindicación de la oficialidá”, esplica’l de Villalegre.

Y ye qu’esta cuestión, munches vegaes desconocida fuera de les nueses llendes, foi lo que provocó l’interés de la organización n’Asturies en xeneral y en Dixebra, en particular. “Comentáronnos que-yos llamó muncho l’atención les informaciones que nesti tiempu foi saliendo sobre les movilizaciones de más de 20.000 persones n’Uviéu pola oficialidá, lo que los llevó a concluyir que tanta xente nun sal a la cai d’un día pa otru; que detrás hai un movimientu importante”, rellata Elipe, que va tar acompañáu nel actu por un representante municipal y pola histórica militante soberanista Fanny Tur, ex consellera del Govern de les Islles Balears.

Eivissencs, eivissenques y los visitantes qu’enllenen la islla en branu van poder agora conocer de primer mano la historia y situación actual del movimientu de reivindicación llingüística y entrugar toles sos duldes, amás de disfrutar del potente direuto de Dixebra. Dos xornaes centraes n’Asturies y nel asturianu nunes fiestes llocales d’esta villa gobernada en coalición pol PSOE y Unides Podem que siempre ponen el focu n’otra realidá llingüística y otros fechos nacionales, con presencia tolos años de bandes n’eusquera, gallegu o aranés.

Les Festes de la Terra tán celebrándose dende ayeri con numberoses actividaes y conciertos de grupos y artistes como Mägo de Oz, esti vienres, o Xavi Sarrià’l llunes, ex cantante de la banda valenciana Obrint Pas col que Dixebra caltién una bona rellación depués de compartir escenariu nel pasáu.

Na imaxe, el ball pagès tuvo presente nel entamu de les Festes de la Terra. Semeya propiedá del Ajuntament d'Eivissa.