Guieldu, Deira y Symbio, nel Intercélticu d'Avilés

La villa vive díes intensos por mor del festival.

El sábadu echó a andar el XXV Festival Intercélticu d'Avilés y Comarca, xornada na que se vivió un gran ambiente cola Nueche en Danza como actividá principal y l'actractivu del Mercáu Celta y la zona de comida en La Esposición. Un gran entamu, al que siguió un domingu con más eventos y l'actuación d'Argayu, pa un certame que va allargase hasta esti próximu domingu.

Güei inauguróse nel Palaciu Valdecarzana la esposición '25 soles' con cartelos, camisestes y semeyes del certame, y a les 19 hores va entamase n'El Llagar de Casa Lin la VII Preba Intercéltica con quesos y sidra DOP, brut y de xelu. La gallega Banda de Gaitas Tradicional Airiños de Fene va facer delles actuaciones y a les 22.15 hores va dar un conciertu Guieldu, el primeru de la banda, pa depués dar pasu a cantares de chigre.

Esbardu, organizadores del Intercélticu, va protagonizar la xornada mañana dende les 13 hores. Pela tarde a les 20.15 hores va haber un Festival d'Asturianada cola escuela Cantu la Vara y de nueche va xubir al escenariu, a les 22.15, el tríu folk asturandaluz Deira, al que va facer relevu depués Ajo Band.

El miércoles va poner l'ambiente musical la formación escocesa Strathaven & District Pipe Band, con un primer pasucais a les 13 hores, mentes qu'Esbardu va facer tamién actuaciones. Los suecos Symbio van tocar pela nueche a les 22.15 y va completase la xornada con una Nueche Asturiana con Faba Glamour y Compango.

Los dos conciertos principales

Los gallegos Luar na Lubre, el vienres, y los castellanos Celtas Cortos, el sábadu, son los dos reclamos principales de la parte final del Intercélticu. Dos cites que, per primer vegada, van ser de pagu, con un preciu de 10 euros.

Lume de Biqueira Celtic Band va animar la nueche de xueves, cuando va entamase una fiesta escocesa. El vienres la folixa va ser gallega y el sábadu, irlandesa, mentes que pal domingu ta programáu l'Andecha Intercéltica que va servir de pieslle al festival cola participación d'Esbardu y les trés agrupaciones d'Alba, Éire y Galicia convidaes.

Na semeya, Ramsés y Ambás nun momentu de l'animada Nueche en Danza del sábadu.