N’Arba y Felpeyu toquen nel XXV Festival de Bandes de Gaites Villa de Candás

El soníu de les gaites torna a tomar les cais de Candás. Estos díes ta celebrándose el XXV Festival de Bandes de Gaites Villa de Candás cola participación d’agrupaciones de Breizh, Galicia y El Bierzu, un certame que tamién programa conciertos de N’Arba y Felpeyu, y ‘Tradicionando’.

Ayeri inauguróse oficialmente’l certame y el Mercáu Tradicional na plaza Hermanos Helio, y güei tán celebrándose los primeros pasucais de les bandes de gaites convidaes. A les 23 hores va celebrase la Nueche de Gaites, un desfile cola participación de toes elles: la Bagad Sonerien Bro Montroulez y Arvorig Breizh Band (Breizh), la Banda Gaitas Xinzo de Limia (Galicia), la Banda Gaitas Castro Bérgidum (El Bierzu) y la Banda de Gaites de Candás, organizadora del festival, y la so Bandina d’Escolinos.

La nueche va siguir con un conciertu de N’Arba, la banda liderada por Xosé Antón Fernández ‘Ambás’ que nos regala pocos conciertos al añu. Va ser a la medianueche en La Baragaña y llueu va haber escenariu abiertu.

El sábadu llocales y visitantes van poder disfrutar de les actuaciones de les bandes convidaes a los llargo de tol día, con pasucais previstos a les 13 y a les 19 hores. A les 23 hores va celebrase en Les Conserveres l’actuación central del festival, llueu d’un nuevu desfile, pa siguir cola música a la 1 en La Baragaña con Felpeyu.

Dos concursos

El domingu, día final del eventu, van tener llugar en La Baragaña los diferentes concursos convocaos. A les 13.30 hores va celebrase’l VII Concursu de Cuerpos de Percusión Villa de Candás y, a les 18 hores, el VII Concursu de Pareyes de Gaita y Tambor Memorial Diego Alonso.

Va poner el ramu, a les 20.30 hores, l’espectáculu ‘Tradicionando’, un viaxe pelos raigaños musicales populares d’Asturies que protagoniza’l Grupu de Baille Tradicional de Fitoria xunto con El Ventolín y la Banda Gaites Xiranda.

Na semeya, la Banda Gaites Candás, organizadora del festival.