Adriana Lastra dexa la vicesecretaría xeneral del PSOE por cuestión de salú

La ribeseyana da esti pasu por cuenta d'un embarazu de riesgu que la obliga a garrar la baxa. Iván Fernández García entra na Executiva Federal pa garantizar presencia asturiana.

Adriana Lastra tomó la decisión d'abandonar el so cargu de vicesecretaria xeneral del PSOE, cargu qu'ocupaba dende'l 2017. "La dificultá de compaxinar les esixencias de reposu y cuidaos, imprescindibles na mio situación actual, cola intensidá qu'esixe la direición del partíu" lleven a la númberu 2 del partíu a dar esti pasu.

El secretariu xeneral de la Federación Socialista Asturiana (FSA), Adrián Barbón, y el del PSOE, Pedro Sánchez, alcordaron la entrada d'un asturianu na Comisión Executiva Federal socialista pa garantizar representación asturiana. L'escoyíu ye Fernández García, alcalde de Corvera y vicesecretariu xeneral d'Aición Política y Institucional de la FSA.