Autores nel Camín va contar con 23 alcuentros en 18 conceyos na segunda metá del añu

Los nueve circuitos de 'Asturies, Cultura en Rede' programen más de 515 eventos.

D'agostu a avientu tán confirmaos 23 alcuentros en 18 conceyos del programa Autores nel Camín, al que se dediquen 50.000 euros. Nel mesmu participen los ganadores de los siete Premios Lliterarios y escénicos que convoca tolos años la Conseyería de Cultura, Política Llingüística y Turismu.

La Sociedá Pública de Xestión y Promoción Turística y Cultural del Principáu d’Asturies encárgase de la programación de 'Asturies, Cultura en Rede', que cuenta con otros ocho circuitos dedicaos a les artes escéniques (167 eventos), la música (78), la lliteratura (99), la cultura tradicional (81), les artes visuales (16), el progama Xacobéu (39), Cuadonga 2022-Camín de los Santuarios (12) y la Cinemateca Ambulante, que principia n'ochobre y entovía nun tien peslláu'l so calendariu. En total, destínase un presupuestu de 959.000 euros nestes propuestes que se ponen a disposición de tolos conceyos del país.

La programación de tolos circuitos pue consultase na web de 'Asturies, Cultura en Rede'.