Celtas Cortos y Luar na Lubre encabecen un XXV Festival Intercélticu d’Avilés qu’entama la so cuenta atrás

El 23 de xunetu va celebrase la ventena quinta edición del Festival Intercélticu d’Avilés y Comarca. Esti martes presentóse’l cartelu d’una edición mui especial que va contar con diez díes d’actividaes y música que tienen como actuaciones principales la de los castellanos Celtas Cortos y los gallegos Luar na Lubre, conciertos que van ser de pagu.

L’artista avilesín Samuel Armas encargóse de la imaxe del certame, obra cola que pretende facer un homenaxe a la villa. Asina, sobre una gaita rescamplen de forma intuitiva dalgunos de los monumentos más representativos, esto ye, escondíos ente’l fuelle, el roncón o’l punteru distínguese’l palaciu consistorial, el Centru Niemeyer, la ponte de San Sebastián, la estatua de Pedro Menéndez, la escultura Avilés del paséu de la ría o una chimenea d’ENSIDESA.

La presentación de cartelu encargáu pola organizadora Asociación Cultural Esbardu sirvió p’arrancar la cuenta atrás pal entamu d’un festival que va tener como allugamientu principal La Esposición. Una Nueche en Danza cola Bandina Turcipié, y Ambás y Ramsés va ser el primer gran eventu’l sábadu 23, a lo que van siguir numberoses actividaes de toa mena, actuaciones de bandes de gaites y conciertos de grupos como Argayu (domingu), Guieldu (llunes), Deira (martes) o Symbio (miércoles), amás d’una fiesta asturiana (miércoles), una escocesa (xueves), una gallega (vienres) y una irlandesa (sábadu 30).

La fin de selmana última del Intercélticu va acoyer les dos actuaciones principales, que per primer vegada va ser de pagu, con entraes yá a la venta a un preciu de 10 euros. Son dos grupos mui conocíos pol públicu asturianu, los gallegos Luar na Lubre’l vienres y los castellanos Celtas Cortos el sábadu.

Na semeya superior, Juan Luis Casas, presidente d'Esbardu; Yolanda Alonso, conceyala de Cultura y Promoción de la Ciudá; y Armas na presentación d'esta mañana. Na inferior, detalle de la creación del artista avilesín pal cartelu del Intercélticu.