El Puntal estrena una Nueche Celta con José Manuel Tejedor, La Tarrancha y Calea

Siguen entamándose esti añu nueves nueches celtes, tan habituales en décades pasaes n’Asturies. El sábadu estrénase la d’El Puntal, que presenta un cartelu conformáu por Calea, La Tarrancha y José Manuel Tejedor, gaiteru que’l domingu tamién va tener espaciu en TPA cola emisión del conciertu de presentación de ‘Lluz’.

La comisión de fiestes de l’asociación vecinal de Samartín del Mar organiza esti eventu que va programar folk y mezigayuska n’asturianu nel área recreativa. Va ser nun recintu zarráu, a un preciu de 5 euros, con comienzu previstu pa les 21 hores.

Los grupos que van tocar son Calea, José Manuel Tejedor y La Tarrancha. Al día siguiente, a les 12.30 hores, va celebrase una sesión vermú con Pandereteres L’Algara y escolinos, y una xinta nel prau.

Cita del Palacio Valdés

Los que nun se puedan desplazar al conceyu de Villaviciosa’l sábadu van tener la oportunidá de sentir a José Manuel Tejedor en TPA’l domingu. L’ente públicu de comunicación va emitir a les 21.45 hores el conciertu de presentación del discu nuevu ‘Lluz’, celebráu nel avilesín Palacio Valdés, el 14 de mayu.

Na imaxe, José Manuel Tejedor nel conciertu de presentación de 'Lluz'.