Cinco de los conceyos del Camín de los Santuarios acueyen el circuitu cultural Cuadonga 2022

Cabrales, Cangues d’Onís, Nava, Piloña y Siero acueyen dende esti miércoles actividaes del circuitu cultural Cuadonga 2022. Son un total de doce actividaes pa poner en valor el patrimoniu etnográficu, cultural y paisaxísticu del itinerariu nuevu dende Llébana a Uviéu, vía Cuadonga, que pasa per ellos y otros seis conceyos asturianos.

La programación en conmemoración de los 1.300 años de la batalla de Cuadonga pon en marcha más eventos. Los siguientes son los que correspuenden al circuitu cultural que va llevar propuestes teatrales, musicales y charres divulgatives dende güei hasta payares en cinco de los conceyos pel que pasa’l Camín de los Santuarios.

La obra ‘Justina y Jacinta (Camino hacia la Batalla de Covadonga)’, de Teatro del Cuervo, abre esta estaya a les 19.30 hores en Nava, mesma hora a la que va representase’l 9 de setiembre en Cangues d’Onís. Al igual que’l restu d’actividaes, a la que la Conseyería de Cultura, Política Llingüística y Turismu destina 30.000 euros, son de baldre pal públicu.

El 17 de xunetu, a les 18 hores, va desendolcase la siguiente actividá, la charra ‘Historia, paisaje y cultura del Camín de los Santuarios’ en Cabrales. Toño Huerta, acompañáu d’una proyeición, va atender a los valores históricos, culturales y naturales de los llugares que percuerre esta ruta.

Completen el circuitu cultural Cuadonga 2022, incluyíu nel programa ‘Asturies, Cultura en Rede’ , la obra ‘Expedición Las Nadies’ d’Hipnótica Circo Teatro (19 de xunetu, Cangues); el conciertu ‘Corri, corri. Música tradicional de cámara céltica’ de la Orquesta Céltica Asturiana (30 de xunetu, Cabrales); la representación de ‘Chanzas, caminos y peregrinos’ d’Higiénico Papel Teatro (19 d’agostu, Nava); el recital ‘Ecos de Covadonga’ de Tina Gutiérrez (16 de setiembre, Piloña; y 7 d’ochobre, Siero); la conferencia ‘El Camín a Cuadonga al so pasu pel conceyu de...’ de Xurde Morán (8 d’ochobre, Cabrales; y 15 de payares, Nava); el xuegu ‘El diario perdido de la Ruta de los Santuarios’ de Blinca Servicios Culturales y de Ocio (16 de payares, Nava); y l’actuación del cuartetu de cuerda Concerto ‘Santuarios musicales’ (21 de payares, Siero).

Na semeya, un momentu de la representación 'Justina y Jacinta'.