Ryanair incorpora rutes con Dublín y Londres a les trés yá previstes

La conexón internacional del Aeropuertu d’Asturies va vese ampliada con dos rutes nueves. Ryanair, que na temporada d’iviernu diba tornar al país con vuelos a Düsseldorf-Weeze, Bruxeles-Charleroi y Roma-Fiumicino, anunció esti miércoles qu’amplía los destinos con Baile Átha Cliath/Dublín y Londres-Stansted dende'l 30 d'ochobre.

La mesa de contratación del concursu p’aumentar la coneutividá internacional dende Santiagu’l Monte a partir de la temporada d’iviernu con 8 llotes permitió la vuelta de la compañía irlandesa al aeródromu al ganar la operatividá de la propuesta con Alemaña, Bélxica y la italiana con Roma. Vueling y Volotea, que yá volaben dende Asturies, llevaben les otres: Londres-Gatwick, París-Orly y Ámsterdam, la primera, y Lisboa y Milàn-Bèrghem la segunda a partir del branu del 2023.

Agora Ryanair incorpora tamién Baile Átha Cliath/Dublín y Londres, en concreto a Stansted, con 2 y 3 vuelos selmanales, de manera respeutiva, dende’l 30 d’ochobre. Los billetes yá tán a la venta con descuentos importantes de promoción.

8 conexones internacionales n’iviernu

Con estes cinco rutes y les yá previstes, esti iviernu Asturies va tener 8 conexones internacionales: Düsseldorf-Weeze, Bruxeles-Charleroi, Roma-Fiumicino, Baile Átha Cliath/Dublín, Londres-Stansted, Londres-Gatwick, París-Orly y Ámsterdam.

Semeya propiedá de Ryanair.