Asturies rexistra los dos primeros casos de viruela del monu

Dos persones “con síntomes leves y que tán aisllaes nos sos domicilios”, según confirmó Lidia Clara Rodríguez, direutora xeneral de Salú Pública, son les dos primeres en contrayer la nomada viruela del monu n’Asturies. Esta enfermedá ye endémica en dos zones d’África y Europa ta viviendo un biltu con cientos de casos dende'l mes pasáu.

La Conseyería de Salú confirmó esta mañana los dos primeros positivos nel virus monkeypox, que provoca la viruela del monu. Les persones afeutaes tán venceyaes ente sí y contraxeron la enfermedá n’otra comunidá autónoma.

“Pel momentu nun se detectaron contautos estrechos asociaos”, aseguró Rodríguez, qu’informó que “la prueba diagnóstica foi una PCR que se fixo llueu de comprobar que la clínica y que la situación epidemiolóxica yeren compatibles con monkeypox”. El Serviciu de Salú del Principáu d’Asturies (SESPA) caltiénse vixilante dende’l 17 de mayu, fecha en que se produxo l’alerta internacional sobre esta infeición vírica qu'acumula cientos de casos n'Europa, col Reinu Xuníu y España como los estaos más afeutaos.

Causada pol virus monkeypox, lleva’l nome de viruela del monu magar nun ser esti animal l’orixe de la mesma, sinón al ser deteutada per primer vegada en simios en llaboratoriu. La tresmisión dase por contautu direutu col sangre, líquidos corporales o feríes d’una persona infestada.