"La única identidá que se ve amenazada colo del topónimu de la ría del Eo ye la de los asturianos", asegura Queipo

El diputáu del PP, qu'emplegó'l gallego-asturianu nun cachu de la so intervención, amosó l'apoyu del so partíu al Gobiernu nesta cuestión.

Álvaro Queipo entrugó nel Plenu de la Xunta Xeneral al Conseyu de Gobiernu "en qué situación ta'l proceso d'aprobación del topónimu 'ría del Eo' llueu de la resolución de la Subsecretaría de Tresportes, Movilidá y Axenda Urbana del Ministeriu de Tresportes, Movilidá y Axenda Urbana contraria al dictame del Instituto Geográfico Nacional". "Negar la posibilidá de la convivencia de los topónimos 'ría del Eo' y 'ría de Ribadeo' ye lo mesmo que negar la bona vecindá qu'esiste ente dambes orielles de la ría", reflexonó en primer llugar el tamién secretariu xeneral del Partido Popular (PP).

"Equivóquense aquellos sectores gallegos que ven nesti procesu una amenza a la so identidá", siguió, pa finar recordando que "nel 2019 el Partido Popular punxo en marcha esti procesu y güei, y digo-ylo en sede parllamentaria, caltenemos l'apoyu al Gobiernu pa que lu culmine". "La única identidá que se ve amenazada con tou esto y l'únicu sentimientu que se ve agraviáu ye'l nuestru, el de los asturianos, porque pretender imponer un topónimu, el de la 'ría de Ribadeo' sobre'l de la 'ría del Eo' ye en sí mesmu un agraviu a la nuesa opinión y al nuesu usu, qu'amás ye estendíu", aseguró l'ex conceyal de Castropol, que na parte final de la so intervención fixo en parte usu del gallego-asturiano xunto col castellanu.

"Nosotros admitimos que desde el Goberno fíxose un bon trabayo na elaboración del informe sobre el uso histórico del topónimo 'ría del Eo'. Fíxose, hay que decirlo, después de que el Partido Popular presentara en esta Cámara a proposta de cambio de topónimo y de que todos los grupos aquí presentes votasen a favor. Y esto significa que, por representación, toda Asturias ta d'acordo en pelear por algo qu'é noso y qu'é noso dereito. Por tanto, señora conseyera, ten usted y el so Gobierno o noso apoyo, entragamosyes a nosa forza, pero nun nos fallen", espresó entemeciendo les dos llingües.

A la espera

Berta Piñán, responsable de Cultura, Política Llingüística y Turismu, esplicó na réplica tol procesu que se llevó hasta la decisión última de la Subsecretaría por un cuestión de forma que s'espera tenga solución. "Gracies señor Queipo por esi apoyu, que dende llueu ye indiscutible y asina lo vien manifestando tou esti tiempu vusté y el grupu al que representa", principió la conseyera, que rellató que la resolución "ceñíase a los aspeutos formales del procedimientu que se llevó alantre p'adoptar la resolución recurrida" dende Galicia, en concreto "el procedimientu de motivación del informe emitíu pola Comisión Especializada de Nomes Xeográficos".

Darréu confirmó que tou "yá se ta poniendo otra vez en marcha y el nuestru espediente, que foi aceptáu como válidu y como xustu, y como vusté bien señalaba, como una muestra de convivencia ente dos topónimos y dos territorios, esperemos que vuelva tener esos resultaos positivos". Esto ye, que se torne a declarar la cooficialidá pa los dos topónimos, 'ría del Eo' y 'ría de Ribadeo'.

Na imaxe, Queipo. Semeya del Grupo Parlamentario Popular.