Espina insiste en que “nun tenemos marxe de maniobra pa crear la especialidá”

Podemos tornó a llevar la cuestión de la especialidá docente de Llingua Asturiana a la Xunta Xeneral, nesta ocasión a Plenu. Y la conseyera d’Educación caltuvo la mesma posición –“nun tenemos marxe de maniobra pa crear la especialidá”– al tiempu qu’espera la respuesta del Conseyu Consultivu “cola esperanza de que nos abra otra puerta”.

Nuria Rodríguez López, que yá tratara sobre esta cuestión en delles ocasiones na Comisión d’Educación, treslladó nesta ocasión a la conseyera “qué valoración fai de les posibilidaes pa la creación de la especialidad d’asturianu y d’a fala eonaviega que citen los caderalgos Xavier Arzoz y José Manuel Pérez nel so informe al respeuto de la oficialidá de las llingües propies asturianes”. “Nós esploramos toles víes hasta’l momentu y siguiremos esplorándoles de forma incansable pa poder intentar solucionar d’una o otra manera la especialidá docente d’asturianu. Lo último que fiximos ye elevar una consulta al Conseyu Consultivu polo qu’entamó la conseyería d’Aragón”, señaló.

Na réplica la diputada de Podemos recordó “que la meyor manera de sofitar y caltener les llingües propies d’Asturies ye la oficialidá”. Darréu, énte la falta de los votos necesarios pa reformar la norma autonómica, citó dicho informe, el ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’ coordináu por Miguel Ángel Presno, que “fala de trés ordenamientos xurídicos que podemos esplorar pa facilitar estes cuestiones” y aseguró que “tenemos posibilidaes suficiente pa nun tener qu’esperar a que llegue la oficialidá”.

“Lo que-y pidimos dende esti grupu parllamentariu, vamos siguir insistendo nel tema, ye que faiga tolo posible” y calcó en que la especialidá docente “ye factible” basándose na opinión de los xuristes autores del informe. “Nun tenemos marxe de maniobra pa crear la especialidá”, insistió Lydia Espina, qu’aseguró que “en tolos espacios nos qu’entrugamos nos dicen lo mesmo, necesitamos la oficialidá”.

El ministeriu recurriría

Sobre l’informe apuntó qu’ésti señala que “podríamos de manera autonómica crear una especialidá docente siempre que l’ámbitu de la mesma se restrinxera a la comunidá autónoma”. “A eso el ministeriu ye lo que nos dixo que non, que nun lo aceptaría y qu’amás lo recurriría” porque, apunten dende Madrid, la norma diz que “correspuende al Gobiernu, previa consulta a la comunidá autonóma, la creación o supresión de la especialidá docente de los cuerpos a los que se refier esta disposición”.

Otra vía que marca’l documentu ye la creación de un “cuerpu docente autonómicu pa que llueu descolgara la especialidá autonómica”. “Ehí tamién nos dicen que la ordenación de los cuerpos docentes tien un calter básicu y que por tanto la regulación que se faiga de los mesmos nun pue alteriar nin la estructura nin la ordenación de los cuerpos del Estáu”, esplicó.

Por último, apuntó que dende la so conseyería siguen trabayando na cuestión y por eso, “viendo lo ocurrío n’Aragón, fixo una consulta al Consultivu cola esperanza de que nos abra otra puerta y otra viabilidá por siguir lluchando por estos derechos”.

Na semeya, Espina esta mañana nel Plenu de la Xunta Xeneral.