Fonseca recibió'l títulu de Fíu Predileutu de Siero

El maestru fixo una defensa del asturianu nel discursu al recibir el reconocimientu.

Foi nun emotivu actu celebráu'l vienres nel Auditoriu de La Pola. Nacho Fonseca recibía de manes de l'alcalde, Ángel Antonio García González 'Cepi', el títulu de Fíu Predileutu de Siero.

L'académicu, creador de Seliquín y Xentiquina, rescampló énte'l numberosu públicu presente el so arguyu de ser polesu y fixo una defensa del asturianu, l'idioma pol que tanto fixo con eses dos formaciones infantiles de música pa neñes y neños. Asina, espresó'l so deséu de que los sos nietos dominen dellos idiomes, ente ellos el propiu, y aseguró que sería "imperdonable" que se dexara morrer la llingua asturiana.

Fonseca recibió esti títulu a propuesta de l'asociación El Llavaderu, que recoyó dellos centenares de firmes, algamando'l so nomamientu la unanimidá nel Plenu. "Un reconocimientu al so gran llabor nel mundu de la cultura, de la educación y de la difusión de la llingua asturiana, pero, sobre manera, pol so gran amor pol nuesu conceyu y por facer que Siero trescienda más allá de les sos llendes", espresó Cepi después del actu institucional.

Xosé Antón González Riaño, presidente de l'Academia de la Llingua Asturiana y l'ex futbolista Javi Fuego tuvieron presentes nun eventu nel que la música, como nun podía ser d'otra forma, foi protagonista, con actuaciones de la so fía Esther o del grupu Los Ñerbatos, del que forma parte l'homenaxáu.