‘Xirar enantes d’echar’ ye'l lema escoyíu pa la campaña de branu de la DOP Sidra d'Asturies

El Conseyu Regulador de la Denominación d'Orixe Protexida (DOP) Sidra d’Asturies presentó la campaña billingüe ‘Xirar enantes d’echar’ de cara al branu pa promover el consumu de los productos ellaboraos baxo esta garantía. Ésta va tar presente en televisión, radio, prensa, Internet y redes sociales, y publicidá estática en dellos soportes.

“Ye una campaña innovadora. Frayóse cola tradición”, rescampló Guillermo Guisasola, presidente del Conseyu Regulador, sobre la idea de Luis Arrontes, direutor de l’axencia creativa Arrontes y Barrera responsable d’un diseñu que busca xugar cola busca de la etiqueta qu’afita que la sidra ta fecho baxo los parámetros de calidá de la DOP y l’escanciáu. El cartelu va poder vese peles cais y chigres del país dende’l vienres, cola previsión d’allargar esta promoción hasta lo último de setiembre, con una versión n’asturianu y otra en castellanu de nome ‘Girar antes de escanciar’.

“Creo qu’esta campaña fidelizará al consumidor habitual y despertará un mayor interés nel públicu más mozu. Apostar pola DOP Sidra d’Asturies ye facelo pol orixe y la calidá”, apuntó nel actu de presentación María Begoña López Fernández, direutora xeneral de Desarrollu Rural y Agroalimentación.

Na semeya, Daniel Ruiz, xerente de la DOP; Arrontes; Elide García, direutora de medios d'Arrontes y Barrera; Guisasola; y López Fernández, colos cartelos de la campaña n'asturianu y castellanu.