La emigración tamién celebró’l Día de les Lletres Asturianes en Montevidéu

El Centro Asturiano-Casa de Asturias de Uruguay tornó a celebrar el Día de les Lletres Asturianes depués de dos años de parón pola pandemia. “Facémoslo con munchu amor y el facelo arriquécenos y enllénanos d’allegría”, apunten dende’l coleutivu, qu’analizó la lletra de ‘Tierra’ de Felpeyu n’homenaxe a Ígor Medio.

Una visita de Pablo Xuan Manzano a Montevidéu, onde punxo un cursu d’asturianu y cultura asturiana, llevó a los emigrantes asturianos n’Uruguái a festexar per primera vegada’l Día de les Lletres Asturianes nel 2002. Dende esi momentu vinieron conmemorando la cita tolos años, a esceición de los dos de pandemia, gracies al esfuerciu de Ligia García, coordinadora de la Comisión de Cultura: “Manzano dionos les claves pa comprender testos n’asturianu, y entender, amás, la importancia de la defensa de la llingua como elementu identitariu. Nació entós el compromisu de celebrar la llingua asturiana”, rescamplen dende’l centru.

“La Comisión de Cultura encárgase d’investigar sobre l’autor que ye homenaxáu esi añu. Tolo facemos al traviés d’Internet y, eventualmente, al traviés de los llibros de les dos biblioteques que tenemos. Pensamos en too, dende la música, los testos, el guión, los souveniers...”, espliquen. Nesta ocasión la fecha escoyida pa la celebración foi’l xueves 12 de mayu na sede d’El Prado de la entidá, onde acudió un bon piñu d’emigrantes y descendientes d’asturianos.

L’homenaxe a Medio consistió nun análisis del cantar ‘Tierra’. Tolos asistentes recibieron la lletra col vocabulariu esplicáu y Mary Tere Villarmarzo dedicó unes pallabres a Asturies.

Torna conxunta de les viñetes d’un cómic

Tamién s’entamó una actividá interactiva consistente na entrega d’un cómic desordenáu pa que se punxera correutamente lo más rápido posible, actividá que pretendía destacar la faceta de dibuxante del xixonés. Animóse darréu a los participantes a tornar les viñetes.

Completóse la celebración del Día de les Lletres Asturianes, na que collaboraron 10 persones de les comisiones de Cultura y Redes Sociales na so organización, cola difusión del proyeutu ‘Asturies, Capital Mundial de la Poesía’ y la llectura del poema ‘Edaes’ de Vanessa Gutiérrez. Hebo d’igual forma videos musicales asturianos, la interpretación de ‘Marcho pa Cuba’ por dos moces del cuerpu de baille del centru, que danzaron una muñeira, y entamóse un brindis onde nun faltaron los bollos preñaos.