Cuevas celebra’l Premiu ‘El Ojo Crítico’ de RNE como “un reconocimientu a toles persones que siguen falando a los sos fíos n’asturianu”

El XXXII Premiu ‘El Ojo Crítico’ de Música Moderna foi pa Rodrigo Cuevas, qu’esti llunes recibió’l gallardón nuna gala nel Museo Reina Sofía de Madrid na qu’interpretó ‘Rambalín’, la canción cola que ganó’l Premiu al Meyor Cantar. L’artista celebrólu como “un contundente reconocimientu a toles persones que siguen falando a los sos fíos n’asturianu y nun se creen tolo malo que-yos dicen”.

El “agitador folclórico”, como lu presentaron, foi ún de los protagonistes del eventu nel que s’entregaben los Premios ‘El Ojo Crítico’ qu’entama l'informativu cultural de Radio Nacional de España (RNE), correspondientes al añu 2021, al qu’acudió’l ministru de Cultura y Deporte, Miquel Iceta. Desplazóse Cuevas a Madrid, amás de pa recibir el reconocimientu na estaya de Música Moderna, pa interpretar con una guitarra ‘Rambalín’, cantar que nunca dexa a naide indiferente.

Al recoyer el troféu conmemorativu apuntó que-y “encanta recibir esti premiu de música moderna faciendo yó músiques tan antigües” y agradeció que “por fin les músiques tradicionales, l’antigüedá, reivindique’l so papel nel presente; lo que nos dexaron los nuesos antepasaos, que’l llegáu de les nueses güeles tea presente nel mundu contemporaneu d’una manera como ésta...”. Tamién dixo sentilu “mui coleutivu” al venir “de les músiques populares, del humor, de les músiques en llingües minorizaes, de la periferia de la periferia de la periferia de la periferia…, esto ye, de les coses más despretixaes, de los repertorios femeninos cantaes con pandereta”.

Por esti motivu celebrólu como “un contundente reconocimientu a toes eses persones que siguen cantando nos chigres, cantando nes sos cases, que siguen falando a los so fíos n’asturianu, en gallegu, en catalán, n’eusquera, n’aragonés, n’andaluz…, en toles llingües y dialeutos qu’hai n’España. Pa toes eses persones que nun se creen tolo malo que-yos dicen cuando falen a los sos fíos n’asturianu y siguen perpetuando la cultura, la más rica que tenemos, que ye la popular”.

José Sacristán, Premiu Especial

Xunto a la estaya de Música Moderna, los Premios ‘El Ojo Crítico’ entregó otros nueve gallardones, rescamplando’l Premiu Especial pal actor José Sacristán pola so trayeutora. El restu d’artistes reconocíos foron Genie Espinosa (Cómic), Janet Novás (Danza), El Patio Teatro (Teatro), Vicky Luengo (Cine), Nuria Güell (Artes Visuales), Abraham Guerrero (Poesía), Laura Fernández (Narrativa) y Xabier Anduaga (Música Clásica).