La XDLA y Paloma Uría reciben los I Premios 25 de Mayu 'Xuaca Bobela y Marica Andayón'

L'Asociación Cultural Entamar, de creación nueva, entrega esti gallardón con dos estayes.

Dos muyeres claves nos acontecimientos desendolcaos en mayu del 1808 que desembocaron na declaración de soberanía de la Xunta Xeneral del día 25, Xuaca Bobela y Marica Andayón, dan nome a los premios colos qu'esti coleutivu pretende recordar a estes dos figures históriques y, al empar, reconocer la llucha polos derechos de toles persones y pola defensa de Asturies por parte de ciudadanos y entidaes. Los dos merecedores d'esta primer edición de los Premios 25 de Mayu 'Xuaca Bobela y Marica Andayón' son la Xunta pola Defensa de la Llingua Asturiana (XDLA) y Paloma Uría.

L'históricu coleutivu que vien cuatro décades trabayando pola oficialidá de les llingües propies d'Asturies lleva la estaya correspondiente a la defensa social, cultural, ecolóxica y política del país por decisión del xuráu conformáu pol historiador y direutor de 'Nortes', Diego Díaz; la escritora y historiadora Pilar Sánchez Vicente; y el cantante Dixebra, Xune Elipe. Xosé Candel va encargase de recoyer el reconocimientu de los premios, que consiste en dos pizarras nes que va grabar una ilustración diferente creaes a costafecha pol artista corveranu Jose Luis Álvarez 'Cuinchi'.

Mentes, Uría, la histórica feminista y ex diputada asturiana por Izquierda Xunida-Bloque por Asturies, algama esti gallardón na categoría de defensa del feminismu, la igualdá, el xéneru y la llucha LGBTI. Nesti casu, fixeron la escoyeta l'activista y esperta en xéneru, Jara Cosculluela; la doctora en Bioloxía, presidenta del comité de empresa de la Universidá d'Uviéu y miembru del coleutivu Llar Trans, Ángeles Fal; y la historiadora, cantautora, articulista y escritora LGBTI, Alicia Ramos.

Esplicaciones de Margolles

La entrega de los I Premios 25 de Mayu 'Xuaca Bobela y Marica Andayón' va tener llugar a les 18.30 hores d'esta tarde na uvieína Corrada l'Obispu. Nel actu van tomar parte Sara Combarros y Sonia Carbajal, en representación d'Entamar, y la historiadora Arantxa Margolles, que va esplicar los fechos históricos de mayu del 1808 nesi llugar tan significativu.

L'actividá va continuar darréu nel chigre Sol y Sombra, pa finar con una sesión musical nel llugar.

Na manifestación, pancarta de la XDLA na manifestación pol XLIII Día de les Lletres Asturianes convocada por esta organización el 7 de mayu, con Candel nel estremu derechu.