Podemos celebra esti 25-M el Día d'Asturies

Reivindica esta fecha pa celebrar la festividá autonómica y organiza un alderique n'Uviéu.

Podemos refierse per primer vegada al 25 de mayu como Día d'Asturies. La formación morada, que venía celebrando hasta l'entamu de la pandemia de COVID-19 una folixa popular nel Muséu del Pueblu d'Asturies con motivu del 8 de setiembre, incorpórase a esta vieya reclamación qu'impulsó Conceyu Bable nos primeros años de la Transición.

Asina, a les 20 hores nel Manglar, organiza la charra-coloquiu 'Reivindicación de la festividá del 25 de mayu como'l Día d'Asturies'. Nella van participar los historiadores Pilar Sánchez Vicente y Alejandro Villa.

Nesta demanda Podemos acompáñase del Ateneo Republicano de Asturias, qu'esti meudía celebró un 'Homenaxe a los héroes que proclamaron la soberanía popular' na placa n'alcordanza instalada na cai Altamirano.