Aína naz pa reconstruyir dende abaxo un espaciu políticu “pensáu dende Asturies y p’Asturies” que fale “de tu a tu” con otres fuercies polítiques

Dende hai dellos díes, nuna trabayada estratexa de comunicación, ta llanzándose mensaxe en redes sociales dende un movimientu organizativu de nome Aína que siguió esti llunes col asoleyamientu d’un videu de presentación d’esta propuesta pa reconstruyir dende abaxo un espaciu políticu “pensáu dende Asturies y p’Asturies”. Una ferramienta pa tresformar el país que busca movilizar a delles xeneraciones.

“Un conxuntu de blimes coles que facer un proyeutu a curtiu, mediu y llargu plazu; ensin priesa pero cola urxencia de constituyise dende abaxo, ensin que factores ayenos condicionen los nuesos ritmos, teniendo los pies en suelu y proyeutando’l futuru, moviéndose cola enerxía de la xente mozo y acoyendo’l trabayu y la esperiencia de la xente que vien calteniendo y semando la semiente pa una Asturies que pague la pena ser vivida”. Asina se presenta Aína, una iniciativa de “xente comprometío cola realidá social y nacional d’Asturies” col enfotu de crear una estructura propia nun momentu nel que se ta reconfigurando la política asturiana y estatal.

Fontes cercanes a Aína rescamplen que “nun ye una asamblea, sinón que quier ser una organización que fale de tu a tu con otres fuercies polítiques y en tolos escenarios políticos”. Dalgo no que tamién se calca na carta de presentación qu’acompaña’l videu: “L’espaciu políticu asturianu tien de tener puxu y plataformes que falen de tu a tu cola sociedá y otres fuercies polítiques: pa facer crítica, pa proponer alternatives, pa xenerar ilusión, pa organizase y amosar la so propuesta y modelu social, económicu, ambiental y cultural pal pueblu asturianu”, espresen al tiempu qu’animen a la ciudadanía “a garrar la pallabra y da-y forma a esti proyeutu”.

En definitiva, “superarar otru tipu d’estructures que se crearon” poniendo sobre la mesa estratexes nueves dientro de l’asturianismu que permitan desendolcar otres estructures propies nes que “nun heba que pidir permisu pa caltener posiciones polítiques soberanistes, d’izquierda y feministes” n’organizaciones ensin visión asturiana nes que munchos militantes tán trabayando anguaño. Un proyeutu d’esti tiempu nel que la comunicación va ser un pegoyu fundamental, como amuesa’l documentu audiovisual asoleyáu esta mañana y la estratexa emplegada estos díes previos, primer pasu d’una serie de convocatories que se van dir anunciando nes selmanes próximes.