Reciella cuenta con un llocal en Xixón y fai un llamamientu p'amoblalu

El barriu xixonés de Moreda, n’El Natahoyo, acueye’l primer llar de ‘Reciella. Families pol Asturianu’, un espaciu vacíu cedíu pol Conceyu nel que l’asociación va centrar tola so actividá. El primer oxetivu va ser acuriosalu, pa lo qu’entama una campaña de micromecenalgu na rede baxo'l títulu 'Amobla l'asturianu del futuru'.

Hasta’l momentu l’importante llabor que’entama Reciella, como La Escolina o’l grupu de teatru toles selmanes, o los talleres y cuentacuentos de manera periódica, desendolcábase n’espacios prestaos por colexos, el Conseyu de la Mocedá o particulares. El contar con un llocal propiu en Moreda va permitir a Reciella potenciar éstos y entamar otros munchos pa siguir fomentando l’emplegu del asturianu ente les neñes y los neños, y ayudar a la tresmisión xeneral del idioma.

Ente los planes ta habilitar una biblioteca pal préstamu de lliteratura infantil y xuvenil en llingua asturiana, y un espaciu como almacén pa tolos materiales del coleutivu. Tamién contar con un llugar pa la receición alministrativa y aconceyamientu.

El primer pasu, al tar el llocal vacíu, ye amoblalu con sielles, meses, estanteríes, percheros, zapateres o alfombres, pa lo que l’asociación pide que-y echen un gabitu a la ciudadanía al traviés d’una campaña de micromecenalgu na rede baxo’l nome de ‘Amobla l’asturianu del futuru’. El presupuestu necesariu mínimu calculáu ye de 2.905 euros y nel primer día de la campaña, nel momentu de redautar esta información, la recaudación diba polos 405 euros, más d’un 10 por cientu del total.

Les persones que quieran cofinanciar esti proyeutu pueden escoyer hasta cuatro tipos d’ayudes, que van dende los 10 euros, col premiu d’apaecer nel cuadru que va colgase na entrada del llocal con tolos nomes de los mecenes, hasta los 100, qu’inclúi amás una pegatina, un imán, una camisteta y un CD con música asturiana pa la reciella. Tamién hai collaboraciones de 20 y 50 euros con diferentes recompenses.