Asturies xube a nivel d'alerta alta por COVID-19

Por mor de l'alta tasa d'ocupación hospitalaria cada 100.000 habitantes. La selmana pasada rexistráronse 434 contaxos diarios de media.

L'actualización última, correspondiente al domingu, asitia a Asturies nun nivel altu de riesgu, el terceru de los cuatro afitaos pol Ministeriu de Salú. La razón son los munchos pacientes ingresaos en planta, un total de 325 cuando la selmana anterior había 238.

Asina supérase esti indicador, la tasa d'ocupación hospitalaria, con 32,91 casos cada 100.000 habitantes –l'únicu de los 6 que ta en riesgu altu–, polo qu'automáticamente'l país pasa a tar nesi nivel d'alerta. Mentes, la tasa d'ocupación UCI (0,8) y el porcentaxe d'ocupación de cames UCI (2,8 por cientu) taá en cifres de 'circulación controlada', con 8 pacientes, 1 menos que la selmana anterior.

Nesos 7 díes finaron 28 persones con COVID-19, polo que'l total del andanciu queda en 2.652. Los contaxos foron 3.040, una media de 434 diarios.

Dende qu'arrancó la quinta fola de la pandemia esta cantidá media foi evolucionó asina: 29, 70, 175, 322, 427, 632, 1.032, 1.905, 2.355, 3.143, 2.538, 1.831, 1.174, 756, 495, 367, 270, 346, 460, 541, 341 –momentu del cambiu na estratexa pola que se centra namái nos casos graves, mayores de 60 años, persones inmunodeprimíes y muyeres qu'esperen un críu– y 373, hasta los 434 actuales.

Fin de la mázcara n'espacios d'interior

La espublización güei nel BOE del Real Decretu sobre l'usu de la mázcara retira la so obligatoridá n'espacios d'interior. Namái nun se pue quitar en centros hospitalarios, como ambulatorios o farmacies; sociosanitarios, como les residencies de mayores; y medios de tresporte públicos.

Na imaxe, gráficu del Observatoriu de Salú n'Asturies de la tasa d'ocupación hospitalaria cada 100.000 habitantes con COVID-19 a fecha del 17 d'abril.