L'Uviéu mete la direuta nun derbi empañáu polos incidentes finales

Los de Ziganda ganen 0-1 con un tantu en propia de Berrocal y consolídense nel sestu puestu al acumular cuatro trunfos siguíos.

L'Uviéu llevo'l sábadu n'El Molinón el segundu derbi de la temporada llueu del empate na ida (1-1). Foi gracies a una xugada desafortunada pa los roxiblancos, yá que'l central cedíu pol Sevilla introduxo na so portería un centru llateral de Cornud tres garrar el balón una parábola imposible pa Cuéllar, yá en suelu.

Nun hebo xugaes pa rescamplar nun duelu de rivalidá mui igualáu, con ausencia d'afición azul organizada pola decisión unillateral del conseyu d'alministración del Sporting de nun unviar entraes a Uviéu, que s'encamiba hacia'l 0-0. Luismi, na primer parte, tuvo la más clara al rematar de voléa un serviciu tamién del francés, con bona intervención del meta llocal, mentes que los roxiblancos namái llegaron con peligru nun centru perfeutu de Djurdjevic que Bogdan nun supo convertir en gol cola cabeza y, yá na segunda parte, con dos disparos del serbiu que resolvió Femenías ensin complicaciones.

El gol del Uviéu llegó nel minutu 78, ensin reaición posterior por parte del equipu llocal magar la entrada al campu de Campuzano y Ramírez. Cuarta victorial siguida pal Uviéu, qu'ocupa, con 57 puntos, l'últimu puestu que da derechu a xugar les eliminatories pol ascensu con 3 de ventaya con Las Palmas y la Ponferradina a falta de 6 xornaes.

Mentes, el Sporting sigue nel fondu de la clasificación, nel puestu 17, con 41 puntos y 7 de colchón col descensu, que marca l'Amorebieta.

Agresión

El xiblíu final de Daniel Jesús Trujillo Suárez traxo la peor cara del derbi. La celebración del Uviéu nel fondu sur, el contrariu onde s'asitiaben los aficionaos azules que se desplazaron a Xixón y s'axuntaron al terminar el partíu na zona visitante del norte, provocó una engarradiella na que participaron hasta futbolistes non convocaos al entender los llocales que yera una provocación.

Mentes, nel otru fondu, Borja López echaba en cara a Femenías actitúes del porteru nel partíu, una discusión que s'agravaría cola llegada de Berrocal y de más futbolistes que taben nel bancu roxiblancu, hasta'l puntu d'agredir al porteru visitante. Bertín llanzó dos pataes, ensin llegar a impautar, y l'ex azul Christian Rivera golpiaba cola mano na cabeza al balear, lo que provocó la espulsión d'entrambos llueu de la intervención del VAR.

A la espera de la sanción correspondiente, ésta podría ser, como poco, de 4 partíos cuando queden 6 pa finar la temporada. Los dos xugadores pidieron ayeri perdón de manera pública en redes sociales pol so comportamientu.