“Les engarradielles van enfoscando cada vegada más y pueden acabar de manera tráxica, o non tanto”, apunta Villa sobre ‘El fervinchu’

Sidoro Villa ta acabante d’asoleyar ‘El fervinchu’, obra cola que ganó’l XLI Premiu Xosefa Xovellanos de novela, correspondiente al añu 2020. L’autor de Lieres fálanos del so cuartu llibru p’adultos nun videu p’Asturies.com, “una llectura que pue resultavos prestosa” que se desendolca “nun mundu rural asturianu en desaniciu”.

La historia, editada por Impronta, tien llugar “nuna casería tradicional a los postrero del sieglu XX”, con engarradielles ente los miembros d’una familia que “van enfoscando cada vegada más y too ello pue acabar d’una manera quiciabes tráxica o quiciabes non tanto”. Una situación na que nun va faltar l’humor prieto tan carauterísticu de les noveles de Villa y que tanto presta a los sos llectores.

L’autor convídanos nesti videu a un fervinchu que paga la pena aceptar.