Barbón diz tar “convencíu” de que la reforma va facese nun “plazu curtiu” incluyendo “la oficialidá de les llingües propies”

“Consideraba, y sigo considerándolo, que yera necesariu un afayamientu del testu a la realidá actual, a la madurez autonómica y institucional d’Asturies”, aseguró esti miércoles Adrián Barbón na conferencia nel RIDEA sobre los 40 años de l’autonomía que compartió con Pedro de Silva. El primer presidente eleutu d’Asturies reivindicó dar valor a les nueses señes d’identidá, como l’idioma.

“Toi convencíu de que la reforma se fadrá realidá a plazu curtiu”, concluyó Barbón la parte de la so intervención na conferencia 'Autonomía asturiana: pasado, presente y futuro' que centró nel tiempu actual. Na modificación de la norma nun faltaría la reconocencia de derechos pa los falantes d’asturianu y del gallego-asturiano n’Asturies: “Por defender la revisión estatutaria, incluyida la oficialidá de les nueses llingües propies, acusáronme de desentendeme de los problemas de los asturianos”, apuntó’l presidente actual, que, ensin citar, refierióse al Partido Popular (PP) al comentar que “pa dalgunos, la nuesa oficialidad amable yera la piel de corderu cola que disfrazábamos un inventu esplosivu, mientres agora reivindiquen ensin apestañar el billingüismu cordial. Si esi ye’l problema, adoptó la cordialidá como axetivu de compañía ensin reparu nengún”.

Sobre esi supuestu desentendimientu, recordó la situación na que s’aprobó l’Estatutu d’Autonomía hai 40 años. “Podríen acusar a los padres del Estatutu de perder el tiempu n’alderiques accesorios nel 1981, cuando la realidá llamaba a les puertes con sonoros avisos de paru y reconversión. Sicasí, naide nun s’atrevería a afirmar güei tal cosa”, puntualizando darréu que “quiciabes dicir naide sía muncho; polo menos, la mayoría de les fuercies polítiques”.

Por últimu, nesta estaya concreta de la conferencia, na que Barbón tocó númberoses cuestiones, rescampló que “defender l’afayamientu del Estatutu p’ameyorar l’autogobiernu, inclusive p’ameyorar dalgunos aspeutos formales de la nuesa norma básica, significa, en primer llugar, confianza na capacidá d’Asturies pa construyir el so propiu futuru”. La importancia de contar cola figura del decretu llei, que permitiera anguaño “eximir de dalgunes tases al tresporte, la ganadería, la agricultura o la pesca”, o la facultá de poder convocar eleiciones foron dos de les posibilidaes citaes pol llavianés pa incluyir nuna futura reforma del Estatutu pa potenciar l’autonomía.

L’autoestima, la meyor materia prima

Moderada pol presidente del Real Instituto de Estudios Asturianos (RIDEA), Ramón Rodríguez Álvarez, y cola participación tamién de De Silva, esta conferencia peslló’l ciclu 'Historias y prospectivas sobre cuarenta años de autonomía asturiana' que se vien celebrando dende avientu baxo la coordinación de Roberto Fernández Llera, miembru correspondiente del RIDEA y Síndicu Mayor de la Sindicatura de Cuentes del Principáu d'Asturies, y Juan Luis Rodríguez-Vigil, presidente d'Asturies ente'l 1991 y el 1993. El mandatariu asturianu ente’l 1983 y el 1991 apuntó que nel pasáu del país “hai munchu futuru” y reivindicó dar valor a les nueses señes d’identidá, “lo que nos diferencia”, incluyendo la llingua asturiana, “porque l’autoestima ye la meyor materia prima”.

Na imaxe, Barbón, Rodríguez Álvarez y De Silva. Semeya obra d'Armando Álvarez.