L’Hospital Begoña y la Clínica Asturias, denunciaes por nun tener númberos de contactu gratuitos

Namás cuatro entidaes sanitaries de les 150 analizaes por Facua cumplen la llei.

L’asociación FACUA-Consumidores en Acción denunció al Hospital Begoña, de Xixón, y la Clínica Asturias, d'Uviéu, por incumplir la llei qu'obliga a disponer de teléfonos gratuitos. Son dos de los 146 hospitales, clíniques y centros sanitarios denunciaos tres un analís sobre'l sector en toa España. La denuncia fízose énte'l Serviciu de Consumu de la Dirección Xeneral de Salú Pública del Principáu d'Asturies y énte la Dirección Xeneral de Consumu del ministeriu d'Alberto Garzón.

FACUA realizó un estudiu de les páxines web de 150 prestadores de servicios sanitarios de les capitales de provincies y les ciudaes que tienen más población que les capitales de la so provincia, ente les que ta Xixón. Toes menos cuatro, incumplen la llei al nun ufiertar una llínea gratuita pa l'atención a los consumidores, faciendo usu d'otres llínies que suponen un desembolsu pala persona usuaria. Nun toes lo faen de la mesma manera, unes combinen teléfonos xeográficos con llínies 902 o de móvil, o depende del departamentu col que se quier falar.

Dende 2020, la Llei Xeneral pa la Defensa de los Consumidores y Usuarios, aprobada pol Real Decretu 1/2007 de 16 de payares, recueye que les empreses que presten servicios básicos han de tener “un teléfonu d'atención al consumidor gratuitu” y especifica que “van tener la considerancia de servicios de calter básicu d'interés xeneral los de suministru d'agua, gas, lletricidá, financieros y de seguros, postales, tresporte aéreu, ferroviariu y per carretera, protección de la salú, saneamientu y restos, según aquellos que llegalmente se determinen".

Poro, les y los consumidores que se vean obligaos a llamar al hospital o clínica de la so zona al traviés de númberos con costu, van poder reclamar l'abonu d'eses cantidaes. Nel casu de les empreses que nun son de servicios básicos, la llei establez que tienen de facilitar un númberu que nun suponga un costu mayor al d'una llamada xeográfica o móvil, colo que si se ven obligaos a llamar a una tarificación especial (902 y 901), tamién tienen derechu a reembolsu.